Fyrrverandi hermaður í bandaríska flughernum, Matthew James Sullivan, lést aðeins nokkrum mánuðum áður en hann átti að bera vitni fyrir bandaríska þinginu um leynilega UFO-áætlun stjórnvalda.

Sullivan, 39 ára, fannst látinn á heimili sínu í Falls Church í Virginíu þann 12. maí 2024 en sagt var frá málinu í fjölmiðlum vestra í dag. Samkvæmt réttarmeinafræðingi lést hann af of stórum skammti lyfja og áfengis, þar á meðal alprazólam (kvíðalyf), vöðvaslakandi lyfi og þunglyndislyfi.

Dauði hans hefur vakið spurningar en þingmaðurinn Eric Burlison sagði málið „vekja alvarlegar áhyggjur“ og vísaði því til rannsóknar hjá FBI með vísan til mögulegra áhrifa á þjóðaröryggi.

Í bréfi til yfirmanns FBI kemur fram að aðstæður dauðans séu grunsamlegar, sérstaklega þar sem Sullivan var á leið að vitna fyrir þinginu um viðkvæmt efni.

FBI hefur ekki staðfest sérstaklega hvort málið sé til rannsóknar, en segir stofnunina vinna að því að kanna möguleg tengsl við fleiri vísindamenn sem hafa látist eða horfið.

Sullivan hlaut meðal annars heiðursorðu fyrir þjónustu sína í hernaði og starfaði síðar hjá ýmsum öryggis- og leyniþjónustustofnunum, þar á meðal NSA.

Samkvæmt heimildum átti hann að upplýsa þingið um svokallaða „UFO-endurheimtaráætlun“ bandarískra stjórnvalda, þar sem haldið er fram að yfirvöld hafi í áratugi haft undir höndum óþekkt fljúgandi fyrirbæri.

Aðrir uppljóstrarar hafa áður greint frá hótunum í kjölfar þess að þeir komu fram með svipaðar upplýsingar. Þar á meðal er David Grusch sem sagðist hafa fengið líflátshótanir eftir að hafa vitnað um slík mál árið 2023.

Þá hafa að minnsta kosti 11 vísindamenn, sem á einn eða annan hátt tengjast rannsóknum á geimverum og fljúgandi furðuhlutum, látist á síðustu mánuðum og árum, eða horfið sporlaust.

Ekki liggur fyrir hvort dauði Sullivan tengist þessum málum, en málið hefur vakið athygli og kallar á frekari rannsókn, að mati sumra þingmanna.