Bandaríski streymirinn Johnny Somali, sem vakti mikla reiði fyrir myndband þar sem hann kyssir styttu til minningar um kóreskar konur sem neyddar voru í kynlífsþrælkun á stríðsárum, hefur verið dæmdur í sex mánaða fangelsi. Dómurinn var kveðinn upp af dómstóli í Seoul í dag

Samkvæmt upplýsingum frá dómsmálayfirvöldum var Somali, sem er 25 ára og heitir réttu nafni Ramsey Khalid Ismael, sakfelldur fyrir brot á lögum um minniháttar afbrot, hindrun á atvinnustarfsemi og dreifingu villandi myndefnis.

Somali varð þekktur á netinu fyrir að birta myndbönd þar sem hann framkvæmdi ögrandi og umdeildar uppákomur, meðal annars í Suður-Kóreu og Japan. Meðal athæfa hans voru að hella núðlusúpu á borð í verslun, spila háværa tónlist frá Norður-Kóreu á almannafæri og stríða farþegum í japönskum lestum með tilvísunum til kjarnorkuárásanna á Hiroshima og Nagasaki árið 1945.

Málið vakti sérstaklega mikla athygli í október 2024 þegar Somali birti myndband þar sem hann kyssir og dansar við styttu sem heiðrar svokallaðar „þægindakonur,“ sem eru konur sem japanskir hernámsmenn neyddu til kynlífsþrælkunar fyrir og á meðan seinni heimstyrjöldin var í gangi. Myndbandið vakti hörð viðbrögð almennings og var síðar fjarlægt.

Somali baðst afsökunar á gjörðum sínum og sagðist ekki hafa gert sér grein fyrir sögulegri og menningarlegri þýðingu styttunnar. Þrátt fyrir það hélst reiði almennings og samkvæmt fréttum var hann ítrekað áreittur og jafnvel beittur líkamlegu ofbeldi af reiðum borgurum.

Við komu sína í dómssal í dag lýsti Somali yfir iðrun og sagðist vilja biðjast afsökunar við kóresku þjóðina og breyta lífi sínu til hins betra.

Dómstóllinn tók fram að ákærur í málinu tengdust ekki sérstaklega vanvirðingu við minnismerkið sjálft, heldur öðrum brotum sem tengjast hegðun hans í landinu.