Kötturinn Sigurlaug virðist hafa sloppið með skrekkinn eftir óvenjulegt fall úr fjölbýlishúsi á höfuðborgarsvæðinu. Sigurlaug féll frá níundu hæð hússins en endaði á fjórðu hæð, þar sem enginn var heima til að koma henni til bjargar.

Slökkvilið höfuðborgarsvæðisins greindi upphaflega frá björguninni á Facebook í gærmorgun og birti mynd af einum slökkviliðsmanna með Sigurlaugu í fanginu eftir að henni hafði verið komið í öruggt skjól.

„Á mynd dagsins má sjá eina af okkar hetjum á B-vaktinni en þarna stendur hann ægilega ánægður með köttinn Sigurlaugu sem féll frá 9. hæð á þá fjórðu en þar var engin heima og var kallað á slökkviliðið til að koma og bjarga Sillu,“ skrifaði slökkviliðið.

Björgunin gekk vel og samkvæmt slökkviliðinu virtist Sigurlaug óslösuð eftir fallið.

Slökkviliðið birti síðan í morgun framhald af sögu Sigurlaugar og sagði að spurningar hefðu vaknað um hvernig kettinum hefði tekist að falla af níundu hæð en lenda á þeirri fjórðu. Mynd frá vettvangi hefði varpað ljósi á það hvernig atvikið bar að.

Að öðru leyti var sólarhringurinn hjá Slökkviliði höfuðborgarsvæðisins nokkuð hefðbundinn. Alls sinnti slökkviliðið 101 sjúkraflutningi og voru þrjú minniháttar útköll skráð á dælubíla.