Björt og vel skipulögð fjögurra herbergja íbúð við Lómasali 16 í Salahverfi í Kópavogi hefur verið sett á sölu. Íbúðin er 116,5 fermetrar að stærð og er á annarri hæð í fjölbýlishúsi með lyftu.
Það er Guðmundur Kristjánsson, landsliðsmaður í knattspyrnu, sem á íbúðina. Hann hefur leikið sjö landsleiki í heildina og einn á þessu ári en hann er lykilmaður í liði Stjörnunnar.
Íbúðin skiptist í forstofu, hol og gang, stofu og borðstofu, eldhús, þrjú svefnherbergi, baðherbergi og þvottahús. Þá fylgir henni 6,7 fermetra sérgeymsla á jarðhæð auk stæðis í lokaðri bílageymslu þar sem tengi er fyrir rafhleðslu.
Eldhús, borðstofa og stofa mynda opið og bjart rými. Eldhúsið er með rúmgóðri innréttingu og glugga við vask en gert er ráð fyrir uppþvottavél í innréttingu. Úr stofunni er gengið út á um 12 fermetra yfirbyggðar svalir sem snúa til suðvesturs. Af svölunum er fallegt útsýni.
Svefnherbergin eru þrjú. Hjónaherbergið er bjart og með fataskápum en annað barnaherbergið er einnig með skáp. Baðherbergið er með rúmgóðu baðkari og innréttingu undir vaski. Sérstakt þvottahús er innan íbúðarinnar með vaski, vinnuborði og skáp.
Nokkrar endurbætur hafa verið gerðar á eigninni á síðustu árum. Skipt var um gólfefni árið 2024 og árið 2026 var komið fyrir nýrri svalalokun.
Sameign hússins er sögð snyrtileg og vel umgengin og sameiginleg hjóla- og vagnageymsla er í kjallara. Inngangur í íbúðina er af svalagangi sem er hálflokaður með gleri.
Eignin er í Salahverfi í Kópavogi þar sem stutt er í skóla og leikskóla. Þá eru Salalaug og íþrótta- og fimleikahús Gerplu skammt undan auk annarrar þjónustu og helstu stofnbrauta.
Íbúðin kostar 90.900.000 og er var reist árið 2003.
