Héraðsdómur Reykjaness hefur dæmt karlmann í þriggja mánaða skilorðsbundið fangelsi fyrir að aka á gangandi konu á gatnamótum Sæbrautar og Kringlumýrarbrautar í Reykjavík í september 2024. Konan hlaut alvarlegan áverka á mjöðm við slysið.

Samkvæmt dóminum ók maðurinn leigubifreið vestur Sæbraut að morgni 3. september 2024 þegar hann fór gegn rauðu umferðarljósi og ók á konu sem var að ganga yfir gatnamótin á grænu gönguljósi. Við áreksturinn féll konan til jarðar og brotnaði á stóru lærhnútu vinstra læris. Hún var flutt á slysadeild og gekkst síðar undir aðgerð þar sem mergnagli var settur til að festa brotið.

Leigubílstjórinn neitaði sök og hélt því fram að grænt ljós hefði verið fyrir akandi umferð en rautt fyrir gangandi vegfarendur. Dómurinn taldi hins vegar framburð brotaþola, sonar hennar og vitnis sem ók á eftir leigubifreiðinni trúverðugan. Vitnið bar að það hefði séð rautt ljós fyrir akandi umferð og fylgst með þegar ökumaðurinn hélt áfram akstri þrátt fyrir að gangandi vegfarendur væru á gangbrautinni.

Dómari taldi því sannað að leigubílstjórinn hefði ekið gegn rauðu ljósi og af gáleysi valdið konunni líkamsmeiðslum. Við ákvörðun refsingar var meðal annars litið til þess að hann starfaði sem leigubílstjóri og hafði áður hlotið skilorðsbundinn dóm. Refsingin var ákveðin þrír mánuðir í fangelsi en fullnustu hennar frestað til tveggja ára. Jafnframt var honum gert að greiða verjendalaun og annan sakarkostnað.