„Frá árinu 2014 hefur Síldarvinnslan hagnast um 70 milljarða króna,“ segir Gunnþór Ingvason, forstjóri Síldarvinnslunnar, í bréfi sínu til hluthafa, þar sem hann segir frumvarp ríkisstjórnarinnar um hækkun veiðigjalda „vanhugsaðar og illa útfærðar tillögur um skattahækkanir sem ekki þola skoðun“.
Í bréfi sínu til hluthafa sem birt er á Facebook - og er auglýst fyrir Íslendingum - gerir Gunnþór tilraun til að svara þeim röksemdum ráðherra ríkisstjórnarinnar að sjávarútvegsfyrirtæki og eigendur þeirra hafi öðlast yfirráð yfir stórum hluta íslensks viðskipta- og atvinnulífs með hagnaði af nýtingu auðlindarinnar. Frumvarp atvinnuvegaráðherra um breyttan útreikning veiðigjalda er talið munu tvöfalda veiðigjöldin sem útgerðir greiða úr 10 milljörðum króna á ári í 20 milljarða, ef miðað er við síðasta ár.
Gunnþór segir að Síldarvinnslan hafi aðeins einu sinni fjárfest í ótengdum rekstri. Þá hafi félagið verið beðið um að fjárfesta í Sjóvá. Samtals keypti Síldarvinnslan fyrir einn og hálfan milljarð í tryggingarfélaginu, en afhendi síðan eigendum félagsins eignarhlutinn þegar Síldarvinnslan var skráð í Kauphöllina 2021. „Í millitíðinni höfðu kaupin fengist til baka í formi arðgreiðslna,“ segir Gunnþór. Þannig fengu eigendurnir hlutinn í Sjóvá upp í hendurnar án greiðslu.
Gunnþór lýsir því að Síldarvinnslan hafi fjárfest fyrir 80 milljarða króna, eða 32 milljarða króna í aflaheimildum og sjávarútvegsfélögum, fyrir 14,4 milljarða í fiskeldisfélaginu Arctic Fish á Vestfjörðum, 19 milljarða í skipum og 14,6 milljarða í fasteignum og tækjabúnaði.
Þá hefur Síldarvinnslan lagt 200 milljónir króna „í verkefni í heimabyggð“. Þau eru kaup á Hótel Hildibrand í Neskaupstað, fasteignafélaginu Miðási og svo kaup á jörðinni Fannardal til kolefnisjöfnunar með trjárækt.
„Einhverra hluta vegna kjósa ráðamenn að fara fram með vanhugsaðar og illa útfærðar tillögur um skattahækkanir“
„Það er háð mikil orrahríð gegn sjávarútvegi nú um stundir. Einhverra hluta vegna kjósa ráðamenn að fara fram með vanhugsaðar og illa útfærðar tillögur um skattahækkanir sem ekki þola skoðun, í stað rökstuðnings og gagna. Farið er fram með rangar staðhæfingar um afkomu sjávarútvegsfyrirtækja og fjárfestingar þeirra gerðar tortryggilegar. Má til dæmis nefna fullyrðingu atvinnuvegaráðherra nýverið um 100 milljarða fjárfestingar sjávarútvegs í óskyldum atvinnurekstri,“ segir Gunnþór. Yfirferð hans náði hins vegar ekki til sjávarútvegsins í heild sinni heldur eingöngu Síldarvinnslunnar.
Gunnþór Ingvason var einn þeirra sem stóð í stafni gegn tilraunum til að hækka veiðigjöld árið 2012, hjá ríkisstjórn Vinstri grænna og Samfylkingar. Á borgarafundi í Neskaupstað með Steingrími J. Sigfússyni, þáverandi sjávarútvegsráðherra, lýsti hann því að frystitogari yrði tekinn úr útgerð og 24 myndu missa vinnuna. „Allir munu tapa. Starfsmenn munu tapa, eigendur munu tapa, fyrirtæki sem vinna með okkur munu tapa, þjóðin mun tapa,“ sagði hann. Þá birti hann myndir af börnum sínum á skjá á fundinum. „Gerum þetta þannig að hún færi börnunum okkar líka framtíð,“ sagði hann.
Það árið, 2012, hagnaðist Síldarvinnslan um 56 milljónir Bandaríkjadala, eða um 7 milljarða króna. Félagið gerir upp í Bandaríkjadal, eins og algengt er með útgerðir. Árið eftir var hagnaðurinn á sjötta milljarð króna. Samanlagður hagnaður frá þeim tíma er því um 83 milljarðar króna að nafnvirði. Stærsti eigandi Síldarvinnslunnar er útgerðarfélagið Samherji, sem á tæplega þriðjungshlut.
