Þrír grímuklæddir menn eru eftirlýstir eftir að maður var rændur og skotinn fyrir utan dýra fataverslun í Vestur Hollywood í Kaliforníu á fimmtudag. Mennirnir flúðu af vettvangi á bifreið sem lenti skömmu síðar í árekstri við Ferrari-bifreið.

Atvikið átti sér stað fyrir utan verslunina Fugazi um klukkan 17.30 að staðartíma. Myndefni úr öryggismyndavélum sýnir þrjá grímuklædda menn stíga út úr bifreið skammt frá versluninni og hlaupa að fórnarlambinu.

Mennirnir umkringdu manninn og rændu hann en skotið var á hann áður en árásarmennirnir flúðu af vettvangi. Maðurinn varð fyrir einu skoti.

Vitni að atvikinu, Uriel Baladez, sagði í samtali við NBC4 að flóttabifreið mannanna hefði rekist á Ferrari-bifreið þar sem maður og barn voru innanborðs. Þrátt fyrir áreksturinn héldu mennirnir áfram för sinni og óku hratt af vettvangi.

Lögregla fann fórnarlambið á gangstétt fyrir utan verslunina. Síðar sást til hans ræða við lögreglumenn inni í versluninni áður en hann var fluttur á sjúkrahús til aðhlynningar. Samkvæmt NBC4 er búist við að hann nái sér af skotsárinu.

Lögregla leitar nú mannanna þriggja. Samkvæmt lýsingu voru þeir allir klæddir svörtum hettupeysum, svörtum buxum og svörtum skóm og sagðir vera meðalvaxnir.

Rannsókn málsins stendur yfir og hefur lögregla óskað eftir upplýsingum sem gætu leitt til þess að mennirnir finnist.