Sjónvarpsfréttamaður og tökumaður slösuðust þegar bifreið rann stjórnlaust á þá í beinni útsendingu í Monterrey í Mexíkó.

Alma de la Rosa Flores, fréttamaður GamaVisión, var að flytja frétt af hættulegum aðstæðum á vegum borgarinnar þegar slysið varð. Hún fjallaði meðal annars um skemmdir sem orðið höfðu eftir að tré féll þegar bifreið, sem virðist hafa misst grip á blautum og hálum veginum, rann í átt að fréttateyminu.

Atvikið náðist í beinni útsendingu. Á upptökunni sést bifreiðin renna inn í mynd og stefna beint á Flores og tökumanninn. Skömmu síðar rofnaði útsendingin frá vettvangi og myndin færðist aftur yfir í sjónvarpsverið.

Viðbragðsaðilar voru kallaðir á staðinn og hlúðu að fréttamönnunum áður en þeir voru fluttir á sjúkrahús til frekari skoðunar.

Samkvæmt fyrstu upplýsingum sluppu bæði Flores og tökumaðurinn með minniháttar meiðsli og voru þau sögð í stöðugu ástandi eftir slysið.

Ökumaður bifreiðarinnar varð eftir á vettvangi. Yfirvöld hófu í kjölfarið rannsókn á tildrögum slyssins og því hvað varð til þess að ökumaðurinn missti stjórn á bifreiðinni.

Atvikið vakti talsverða athygli enda breyttist fréttaflutningur af hættulegum akstursskilyrðum á örfáum sekúndum í alvarlegt slys þar sem fréttateymið sjálft varð fyrir bifreið.