Lögregla á höfuðborgarsvæðinu hafði í nógu að snúast síðasta sólarhringinn vegna fjölda mála sem komu inn á borð hennar, þar á meðal innbrota, líkamsárása og máls þar sem maður sást með eftirlíkingu af skotvopni.
Tilkynnt var um mann sem gekk berserksgang í rafvöruverslun í Reykjavík. Starfsmenn verslunarinnar náðu að halda honum niðri þar til lögregla mætti á vettvang. Maðurinn reyndist vera undir áhrifum vímuefna og þekktur hjá lögreglu. Hann var handtekinn og vistaður í fangaklefa.
Þá var lögreglu einnig tilkynnt um útigangsmann sem hafði komið sér fyrir í anddyri líkamsræktarstöðvar og var til ama fyrir gesti. Honum var vísað af staðnum.
Lögregla brást jafnframt við tilkynningu um yfirstandandi innbrot í grunnskóla í Reykjavík. Samkvæmt upplýsingum voru rúður brotnar með verkfærum til að komast inn í húsnæðið. Grunaður innbrotsþjófur var handtekinn skammt frá vettvangi og náðist að endurheimta þýfi úr málinu. Maðurinn, sem er þekktur hjá lögreglu, var rólegur og í skýrsluhæfu ástandi. Honum var sleppt að lokinni skýrslutöku.
Alvarlegra mál kom upp þegar tveir menn mættu á lögreglustöðina við Hverfisgötu, annar þeirra með blæðandi áverka í andliti. Mennirnir sögðust hafa orðið fyrir stunguárás af hendi nafngreinds manns skammt frá lögreglustöðinni. Lögregla hóf þegar leit að meintum árásarmanni og fann hann skömmu síðar. Hann var handtekinn og vistaður í fangaklefa. Árásarþolarnir voru fluttir á bráðamóttöku Landspítalans til frekari aðhlynningar.
Einnig var lögreglu tilkynnt um mann sem sagður var vera með skotvopn á bar í Reykjavík. Að sögn vitna hafði hann ekki hótað neinum heldur einungis sést með vopnið. Lögregla hafði uppi á manninum og handtók hann. Við nánari skoðun kom í ljós að um eftirlíkingu af skotvopni var að ræða. Maðurinn var undir áhrifum vímuefna og var vistaður í fangaklefa.
Loks var tilkynnt um innbrot í íbúðarhúsnæði í Reykjavík. Grunaður maður yfirgaf vettvang áður en lögregla kom á staðinn en fannst skömmu síðar. Nær öllu þýfi var skilað til eigandans. Maðurinn er þekktur hjá lögreglu og var vistaður í fangaklefa vegna málsins.
