Setningin „Trump er látinn“ hefur sprungið út á samfélagsmiðlum þar sem gríðarleg umræða hefur skapast um nánast örugglega rangar sögusagnir.
Donald Trump hefur ekki sést opinberlega í þrjá daga og fjarvera hans hefur orðið til þess að frasinn „Trump er látinn“ hefur tekið yfir bæði X og Facebook. Þetta kemur í kjölfar nýlegra vangaveltna um heilsufar forsetans eftir að ljósmyndir birtust þar sem hann virtist vera með marblett á hendi. Orðrómar virðast einnig hafa fengið byr undir báða vængi vegna athugasemda frá varaforseta Trumps, JD Vance, sem og Matt Groening, skapara The Simpsons.
Síðan Trump tók við embætti hefur það gerst nokkrum sinnum að hinn 79 ára gamli forseti hafi horfið tímabundið úr sviðsljósinu. Margir þeirra sem nú dreifa samsæriskenningum á netinu benda á að engir opinberir viðburðir séu skráðir hjá Trump um helgina, en það er algjörlega eðlilegt fyrir forseta. Þá hefur Trump sjálfur verið virkur á Truth Social síðan hann sást síðast opinberlega.
Þann 27. ágúst var Vance spurður hvort hann væri tilbúinn að taka við stjórn landsins ef „hræðilegur harmleikur“ ætti sér stað. Í viðtali við USA Today fullyrti hann að forsetinn væri í góðu formi, en viðurkenndi þó að ekkert mætti útiloka.
„Hann er síðasti maðurinn sem hringir á kvöldin og fyrsti maðurinn sem vaknar og hringir á morgnana,“ sagði Vance.
„Já, hræðilegir atburðir geta gerst. En ég er fullviss um að forseti Bandaríkjanna sé í góðu formi, muni ljúka kjörtímabilinu og gera frábæra hluti fyrir bandarísku þjóðina. Og ef, Guð forði því, að eitthvað hryllilegt gerist, þá get ég ekki hugsað mér betri starfsþjálfun en þá sem ég hef fengið síðustu 200 dagana.“
Heilsuáhyggjur Trumps hafa þó verið í brennidepli upp á síðkastið. Í júlí staðfesti Hvíta húsið að hann glímdi við sjúkdóm í bláæðum sem kallast langvinn bláæðabilun (chronic venous insufficiency, CVI), sem veldur bjúg í fótum. Sjúkdómurinn veldur auknum þrýstingi í æðum og getur leitt til bjúgs og sára, en telst ekki lífshættulegur. Áður en þetta var opinberað höfðu ljósmyndir af bólgnum fótum Trumps á samfélagsmiðlum kveikt á vangaveltum um heilsu hans.
Í vikunni sást svo það sem virtist vera marblettur á hendi forsetans þegar hann skrifaði undir tilskipun. Svipað sást í golfmyndbandi þar sem hann virtist einnig með mar á hendi, og í annarri mynd var eins og þykk förðun hefði verið borin á hana. Sérfræðingar telja að marblettirnir gætu tengst nýlegri innsetningu á æðalegg, sem bendi til að forsetinn hafi fengið lyfjameðferð í æð vegna ótilgreinds kvilla.
Í júlí var Matt Groening, höfundur The Simpsons, spurður hvenær áætlað væri að þátturinn, sem hefur verið á dagskrá í 36 ár, myndi ljúka. Hann sagði við Variety að „engin endalok væru í sjónmáli“, en tengdi þó lok þáttanna við andlát Bandaríkjaforseta.
„Nei, engin endalok sjást. Við ætlum að halda áfram. Við förum þar til einhver deyr,“ sagði Groening.
Hann bætti svo við: „Þegar þú veist hver deyr, þá spáir The Simpsons því að fólk muni dansa á götum úti. Nema að forsetinn (J.D.) Vance muni banna dans.“
Athugasemdirnar vöktu mikla athygli á samfélagsmiðlum, þar sem margir telja að þættirnir hafi ítrekað spáð fyrir um raunverulega atburði. Sumir aðdáendur eru jafnvel sannfærðir um að þátturinn hafi spáð fyrir um uppgang Trumps til valda strax árið 2000.
Komment