Tónlistarmaðurinn Bubbi Morthens gagnrýnir harðlega það sem hann kallar notkun ótta sem stjórntækis í samfélaginu í nýrri Facebook-færslu sem hann birti í morgun.
Í færslunni lýsir hann ótta sem skaðlegu afli sem hafi víðtæk áhrif á einstaklinga og samfélag.
„Óttinn er versti ferðafélagi sem maður getur hugsað sér. Hann rænir mann rökhugsun, hann rænir mann orku, gerir mann dimman, útilokar rök, gerir mann árásargjarnan,“ skrifar hann.
Bubbi segir að ótti sé víða nýttur til að hafa áhrif á fólk, meðal annars af fyrirtækjum og hagsmunaaðilum.
„Ótti er líka notaður til að stjórna fólki. Til eru fyrirtæki, moldrík, sem nýta til dæmis óttann sem stjórnunartæki til að verja hagsmuni sína,“ segir hann og bætir við að slíkir aðilar starfi oft „bakvið tjöldin“.
Hann nefnir jafnframt dæmi úr samfélagsumræðunni þar sem ótti sé notaður, meðal annars í tengslum við hinsegin fræðslu í skólum.
„Hinsegin fræðsla í skólum fer í taugarnar á sumu fólki sem fer mikinn um lífshættuna sem börn eru sett í, eða þannig tala þau,“ skrifar hann.
Þá gagnrýnir hann einnig ummæli kaþólskra presta sem hann segir hafa talað í svipuðum anda og jafnvel gefið í skyn að hægt sé að „afhomma fólk“. Í því samhengi bendir hann á ásakanir um misnotkun innan kirkjunnar
„Þá væri kannski best að byrja á prestum kirkju hans sem hafa stundað skefjalaust barnaníð í skjóli kirkjunnar eins og hefur verið að koma uppá yfirborðið á undanförnum árum.“
Bubbi fjallar einnig um umræðu um Evrópusambandið og efnahagsmál hér á landi og segir að þar sé ótta einnig beitt sem vopni. Hann nefnir meðal annars stöðu krónunnar, háa vexti og erfiða stöðu ungs fólks á húsnæðismarkaði.
Í lok færslunnar hvetur hann fólk til að horfast í augu við óttann.
„Eina leiðin til að sigrast á óttanum er að stíga inní hann, þá verður maður frjáls og myrkrið hverfur,“ skrifar hann og bætir við að þrátt fyrir allt séu til öfl sem líti á ótta sem „góða fjárfestingu“.
