Bloggarinn Páll Vilhjálmsson, er orðinn einn af sérmerktum höfundum vefmiðilsins Fréttarinnar.is, sem Margrét Friðriksdóttir heldur úti.
Páll, sem er þekktur fyrir baráttu sína fyrir óheft og óheflað málfrelsi um þá sem gagnrýna eða fjalla um útgerðarrisann Samherja, fjallar meðal annars um „stolta fánabera“ á Austurvelli í mótmælum þjóðernissinna um helgina, þar sem Margrét hélt einmitt ræðu.
Í ræðu sinni kynnti Margrét vefmiðilinn sinn og sagði að „ofbeldisfólk“ hefði sakað Fréttina.is um „skáldskap og falsfréttamennsku“ og að vera „einkablogg Margrétar Friðriks“. „Staðreyndin er sú að fjölmargir höfundar eru fastapennar á Fréttinni. Fastir pennar eru meðal annars reyndir blaðamenn og fjölmiðlafræðingar,“ sagði hún.
Páll Vilhjálmsson, sem starfað hefur sem kennari í Fjölbrautarskólanum í Garðabæ, titlar sig einmitt blaðamann. Fastar greinar Páls á Fréttinni birtast hins vegar líka á bloggsíðu hans. Því er ljóst að bæði Staksteinar Morgunblaðsins, í ritstjórn Davíðs Oddssonar, og Fréttin.is sameinast um reglulegar endurbirtingar á efni hans.
Meðal annarra höfunda á Fréttinni, sem eru merkisberar ágætis íslensku þjóðarinnar, eru Hallur Hallsson, Haukur Hauksson, blaðamaður og Rússlandsvinur, Erna Ýr Öldudóttir og Eldur Smári.
Þá sagði Margét að gagnrýnendur Fréttarinnar.is hefðu ekki geta bent á „eina falsfrétt“ á miðilnum. Sjálf er hún komin með nafnlausa staðfestingu á hópnauðgunarmáli sem hún fjallaði um á dögunum og tengdi níu hælisleitendur við, en lögreglan kannaðist ekki við, þrátt fyrir heimildir Fréttarinnar þess efnis.
