Utanríkisráðuneyti Rússlands sendi frá sér fjórar aðskildar yfirlýsingar vegna hernaðaraðgerða Washington í Venesúela í fyrradag og fordæmdi þær sem „vopnaða árás Bandaríkjanna gegn Venesúela“.
„Hugmyndafræðilegur fjandskapur hefur sigrað praktíska samskiptaþróun,“ sagði ráðuneytið í fyrstu yfirlýsingu sinni. Í annarri yfirlýsingu, sem birt var tveimur klukkustundum síðar, fjallaði Moskva um fyrstu fréttir af því að Maduro-hjónin hefðu verið numin á brott og sagði það „óásættanlegt brot á fullveldi sjálfstæðs ríkis, en virðing fyrir fullveldi er grundvallarregla alþjóðalaga“.
Nokkrum klukkustundum síðar greindi Moskva frá því að Sergei Lavrov, utanríkisráðherra Rússlands, hefði átt símtal við varaforseta Venesúela, Delcy Rodríguez, þar sem þau ítrekuðu „sameiginlega skuldbindingu sína til að efla víðtækt stefnumótandi samstarf Rússlands og Venesúela“.
Um það bil tuttugu mínútum síðar brást ráðuneytið við staðfestingu þess að Maduro-hjónin væru nú í haldi Bandaríkjanna og sagði: „Við skorum eindregið á bandarísk stjórnvöld að endurskoða afstöðu sína og láta löglega kjörinn forseta fullvalda ríkis og eiginkonu hans lausa.“
Viðbrögð Kænugarðs
Í færslu á X sagði Andrii Sybiha, utanríkisráðherra Úkraínu, að „stjórn Maduro“ hefði brotið gegn mannréttindum og „rétti þjóða til að lifa frjáls“ og lagði áherslu á að Kænugarður viðurkenndi ekki lögmæti Maduro sem forseta.
„Íbúar Venesúela verða að fá tækifæri til eðlilegs lífs, öryggis, velmegunar og mannlegrar reisnar,“ sagði Sybiha og bætti við að Úkraína styddi „frekari þróun mála í samræmi við meginreglur alþjóðalaga“.
Volodymyr Zelensky, forseti Úkraínu, tjáði sig um atburðina í Venesúela í gær þar sem hann sagðist vona að Vladimir Pútín yrði tekinn næst af Bandaríkjamönnum. Hann fjallaði einnig um Venesúela á X-inu í ágúst 2024, þegar hann fordæmdi fréttir af því að rússneskir málaliðar hefðu styrkt stjórnarher Venesúela. „Þetta er skýrt dæmi um blygðunarlausa íhlutun Rússlands í málefni annarra ríkja,“ skrifaði Zelensky þá.
Viðbrögð Evrópu
Ursula von der Leyen, forseti framkvæmdastjórnar Evrópusambandsins, og Kaja Kallas, æðsti fulltrúi ESB í utanríkis- og öryggismálum, notuðu svipað orðalag í viðbrögðum sínum við árás Bandaríkjanna á Venesúela.
Báðar lýstu yfir stuðningi við „friðsamleg valdaskipti“ í kjölfar handtöku Maduro og lögðu áherslu á að virða bæri alþjóðalög. „ESB hefur ítrekað lýst því yfir að Nicolás Maduro skorti lögmæti,“ bætti Kallas við.
