Einbýlishús við Hlíðarhjalla 16 í Kópavogi hefur verið sett á sölu fyrir 205 milljónir króna. Húsið er 270,5 fermetrar að birtri stærð, á tveimur hæðum og var reist árið 1989.

Eignin stendur í rólegri botnlangagötu í suðurhlíðum Kópavogs og hefur samkvæmt fasteignaauglýsingu fengið gott viðhald í gegnum tíðina. Fyrir tveimur árum var bílastæði við húsið stækkað og lóðin endurgerð. Þá var meðal annars útbúinn rúmgóður sólpallur til suðurs með heitum potti og reistur átta fermetra geymsluskúr. Þak hússins er jafnframt nýlegt.

Árið 2024 var parket í húsinu slípað og lakkað og ný útiljós sett upp.

Á efri hæð hússins eru anddyri, stofa, eldhús, tvö svefnherbergi og baðherbergi. Auk þess hefur verið útbúið aukasvefnherbergi í hluta stofunnar en hægt er að breyta því aftur og stækka stofuna.

Á neðri hæð eru þrjú svefnherbergi, fataherbergi, baðherbergi með saunaklefa, þvottahús og geymsla eða hobbýherbergi. Bílskúr er samtengdur húsinu.

Lóðin er fullfrágengin og frá henni er útsýni yfir gróðursælt umhverfi. Stutt er frá húsinu í göngustíga og útivistarsvæði í Kópavogsdal.