Íslensk athafnakona, sem ekki vill koma fram undir nafni, segir frá grimmu ofbeldi sem hún varð vitni að síðustu nótt en að hennar sögn var gerandi leigubílstjóri og fórnarlambið ung kona.
„Ég vaknaði við hræðileg stingandi öskur á hjálp fyrir utan heimili mitt í nótt. Þar var ung kona sem var verið að draga út úr leigubíl og var hún barin, tekin hálstaki, dregin á fótunum á blautri götunni, öskrað á ,kölluð niðrandi orðum og að lokum ók hann á hana og bakkaði og keyrði burt. Ég hélt að það væri verið að drepa hana,“ segir konan í færslu, sem nú hefur verið eytt.
„Við vorum mörg sem sáum þetta allt og líka börn. Konan var alblóðug í framan og á höndum og í miklu sjokki og kallaði til mín og bað mig að koma til sín. Ég hljóp út til hennar og þá voru fleiri grannar komnir út til að hlúa að henni. Við vorum nokkur sem hringdum í lögregluna sem kom að mér fannst um 10 mínútum síðar og sjúkrabíll í kjölfarið,“ heldur hún áfram.
Konan faðmaði athafnakonuna í framhaldinu og sagðist ekki vilja fara ein inn í bíl með lögreglunni og bað hana að koma með sér. Hún hafi verið lafandi hrædd.
„Ég veit að þetta var tilkynnt til nokkra fjölmiðla í dag, ekki af mér heldur af öðrum sem voru vitni að þessum hræðilega atburð en engin hefur fjallað um þetta mál. Í tilkynningu kemur meðal annars fram að leigubílsstjórinn hafi verið stór þrekinn af erlendum uppruna,“ segir athafnakonan. Rétt er að taka fram að Mannlífi hefur ekki borist tilkynning um þetta mál.
Vitnið segist hafa séð leigubílstjórann vel. „Hann öskraði eins og ljón og var sturlaður af reiði við konuna og meðferðin hrikaleg þó svo að hann hafi séð okkur nokkur út um gluggana okkar kallandi á hann að biðja hann um að stoppa. Ég sá líka bílinn vel og ein náði bílnúmerinu. Lögreglan hafði ekki mikin áhuga á að fá að ræða við þá sem sáu allt. Lögreglan sagði líka hluti við konuna sem við hefðum ekki átt að heyra sem vorum stödd þarna. Trúnaðarmál,“ segir konan um manninn og málið.
„Ég ætlaði ekki að þora að segja frá þessu hér en við höfum öll samfélagslega ábyrgð og ég ætla að hafa þetta hér í kvöld og mikið vona ég að þessi leigubílstjóri hafi verið handtekinn , missi leyfið (ef hann er með leyfi) og að unga konan sé í lagi. Miðað við þessa hræðilegu reynslu.“
Konan segir í lokin að það eigi að felast öryggi í því að taka leigubíl heim til sín og spyr svo hvert við séum komin sem samfélag.
