Falleg og mikið endurnýjuð fjögurra herbergja íbúð í fjölbýlishúsi í Laugardal í Reykjavík er komin á sölu. Eignin er 107,7 fermetrar að stærð og er ásett verð 81,9 milljónir króna.

Íbúðin er á annarri hæð húss sem reist var árið 1961 og teiknað af Sigvalda Thordarsyni. Gengið er upp eina og hálfa hæð að íbúðinni.

Samkvæmt skráningu HMS er birt stærð eignarinnar 107,7 fermetrar og þar af er 9,1 fermetra sérgeymsla í kjallara. Íbúðin skiptist í anddyri, eldhús, stofu og borðstofu, þrjú svefnherbergi og baðherbergi.

Stofan er rúmgóð og björt og þaðan er gengið út á rúmgóðar suðursvalir. Gluggar í stofunni hafa verið endurnýjaðir. Í eldhúsi er falleg innrétting með kvartsteini á borðplötum og innbyggðri uppþvottavél.

Hjónaherbergið er rúmgott og með góðu skápaplássi. Tvö barnaherbergi eru einnig í íbúðinni og eru þau bæði rúmgóð.

Baðherbergið hefur verið endurnýjað frá grunni og þar er meðal annars sturta, vegghengt salerni og góð innrétting. Þá er þar aðstaða fyrir bæði þvottavél og þurrkara.

Eignin er á fjölskylduvænum stað í Laugardal, skammt frá grunnskólum, verslunum og annarri þjónustu. Þá er stutt í útivistar- og náttúrusvæði Laugardalsins.