Til sölu er 53,9 fermetra einbýlishús í Svarfaðardal sem sker sig nokkuð úr, en húsið er samsett úr tveimur gámum. Ásett verð eignarinnar er 34,9 milljónir króna.
Húsið stendur á 2.025 fermetra leigulóð úr landi Hreiðarsstaðakots og var byggt árið 1989. Það var upphaflega reist sem sumarhús en hefur síðar verið skráð sem einbýlishús. Af þeim sökum er heimilt að skrá lögheimili í húsinu hjá viðkomandi sveitarfélagi.
Eigninni er lýst sem hlýlegri og bjartri. Við húsið er góð verönd sem snýr til suðvesturs og á lóðinni stendur einnig geymsluskúr sem fylgir eigninni.
Innandyra eru tvö svefnherbergi, stofa, eldhús og borðstofa, baðherbergi og forstofa. Parket er á gólfum í stofu, eldhúsi, borðstofu og svefnherbergjum. Í hjónaherberginu er rúmgóður fataskápur.
Í eldhúsinu er eldri en björt innrétting og þar er jafnframt aðstaða fyrir borðstofu. Baðherbergið er flísalagt og þar er sturtuklefi og gluggi. Aðstaða fyrir þvottavél er á milli forstofu og baðherbergis.
Þrátt fyrir óhefðbundna byggingaraðferð hefur húsið því alla helstu eiginleika hefðbundins smærra einbýlishúss. Ásett verð, 34,9 milljónir króna, jafngildir um 647 þúsund krónum á fermetra.
