Til sölu er afar glæsilegt og mikið endurnýjað einbýlishús við Sunnuflöt 5 í Garðabæ.

Um er að ræða 254 fermetra fasteign á tveimur hæðum, byggða árið 1967, sem hefur fengið gott viðhald í gegnum árin og stendur á fallegri og vel hannaðri lóð með útsýni.

Á efri hæð hússins er rúmgóð forstofa og hol, samliggjandi borð- og setustofa, sjónvarpsstofa og eldhús. Þá eru á hæðinni tvö barnaherbergi, hjónasvíta með sérbaðherbergi auk tveggja annarra baðherbergja og gangs.

Neðri hæðin er einnig vel nýtt, en þar er að finna aðra forstofu, hol, tvö stór barnaherbergi, baðherbergi, geymslu, líkamsræktarrými og þvottaherbergi, auk bílskúrs.

Lóðin þykir sérlega glæsileg, með afgirtum og skjólgóðum veröndum. Á baklóðinni er stór viðarverönd með heitum potti, skjólveggjum og tjörn, auk þriggja smáhýsa, þar af tveggja með rafmagni og hita. Innkeyrsla er hellulögð og búin hitalögnum, líkt og verönd og tröppur.

Staðsetningin er talin einstaklega góð, með stutt í skóla, íþróttir, verslanir og útivistarsvæði, þar á meðal í Heiðmörk. Þá eru fallegar gönguleiðir í næsta nágrenni.

Ásett verð eignarinnar er 269 milljónir króna.