Glæsilegt 385,4 fermetra einbýlishús við Breiðahvarf 6 í Kópavogi hefur verið sett á sölu. Ásett verð eignarinnar er 275 milljónir króna.

Húsið var reist árið 2008 og stendur á 1.227 fermetra lóð á eftirsóttum stað skammt frá Elliðavatni. Samkvæmt fasteignaauglýsingunni er útsýni frá húsinu til allra átta og lofthæð meiri en gengur og gerist á báðum hæðum.

Í húsinu eru nú tvær aukaíbúðir en tekið er fram að tiltölulega einfalt sé að breyta skipulaginu þannig að húsið verði ein heild. Alls eru þrjú baðherbergi auk gestasalernis og tvær sólstofur með loftkælingu.

Innréttingar eru sérsmíðaðar og í eldhúsi eru granítborðplötur og tæki frá Miele.

Á neðri hæð er meðal annars rúmgóð forstofa, gestasalerni, þvottahús og glæsilegt hol með hringstiga. Þar nær lofthæðin rúmlega sex metrum. Úr holinu er gengið út í gróna lóð með verönd og gróðurhúsi.

Fram kemur í auglýsingunni að eignin bjóði upp á fjölbreytta nýtingarmöguleika og að eigandi skoði möguleika á að taka aðra fasteign upp í kaupverðið.