Einbýlishús við Skólagerði 69 í Kópavogi hefur verið sett á sölu fyrir 169,5 milljónir króna. Húsið var reist árið 1947 og hefur verið mikið endurnýjað á undanförnum árum.

Eignin er á Kársnesinu og er skráð 214 fermetrar að stærð hjá HMS, þar af er sérstæður bílskúr 45 fermetrar. Um er að ræða sjö herbergja hús á tveimur hæðum auk um 25 fermetra útleigueiningar með sérinngangi.

Á neðri hæð hússins eru anddyri, eldhús, stofa og borðstofa auk þriggja svefnherbergja. Þar er einnig endurnýjað baðherbergi með tengingum fyrir þvottavél og þurrkara.

Á efri hæð er alrými og herbergi ásamt gestasalerni og þakgeymslu. Í austurenda hússins er útleigueining með sérinngangi. Þar er alrými, eldhúskrókur og baðherbergi.

Við húsið stendur stór sérstæður bílskúr með hellulögðu gólfi. Timburverönd liggur meðfram suður- og vesturhlið hússins og er garðurinn sagður rúmgóður.

Í sölulýsingu er sérstaklega vakin athygli á því að eignin hafi verið mikið endurnýjuð og skipulag hennar sé skemmtilegt. Þá er stutt í bæði skóla og leikskóla.

Ásett verð Skólagerðis 69 er 169,5 milljónir króna, sem jafngildir um 792 þúsund krónum á hvern skráðan fermetra eignarinnar.