Afar glæsilegt og rúmgott einbýlishús við Melhæð 6 í Garðabæ er komið á sölu. Húsið er á tveimur hæðum, tæplega 500 fermetrar að grunnfleti og er ásett verð 315 milljónir króna.
Húsið var reist árið 1991 og er jarðhæð þess skráð 375 fermetrar, þar af er tvöfaldur bílskúr 85 fermetrar. Efri hæðin er skráð 92 fermetrar en tekið er fram í fasteignalýsingu að grunnflötur hennar sé töluvert stærri.
Þá er skrifstofa Útfararstofa Garðabæjar staðsett í húsinu
Í húsinu eru fimm svefnherbergi, tvö baðherbergi, tvö gestasalerni og þrjár rúmgóðar stofur, auk sólskála. Þá eru tvö anddyri í húsinu, bæði rúmgóð og með stórum fataskápum, flísum á gólfum og gólfhita.
Sólskáli hússins er jafnframt vel búinn en þar er að finna sturtu, heitan pott og saunaklefa.
Hjónasvítan er á jarðhæð og henni fylgir fataherbergi ásamt stóru sérbaðherbergi þar sem bæði eru sturta og baðkar. Tvö gestasalerni eru einnig á hæðinni.
Þrjú svefnherbergi eru á efri hæðinni og hefur hvert þeirra aðgang að sérsvölum. Þar er einnig baðherbergi með sturtu, þvottahús og lítil geymsla.
