Sex manns hafa verið drepnir eftir að ísraelskir hermenn hófu skothríð á fólk sem þeir sögðu hafa nálgast hermenn við vopnahléslínu í norðurhluta Gaza í dag.
Í yfirlýsingu frá ísraelska hernum kom fram að nokkrir grunaðir hefðu verið spottaðir og skotnir til að „fjarlægja ógnina“ vegna þess að um væri að ræða „brot á vopnahléssamkomulaginu“. Heilbrigðisyfirvöld á Gaza sögðu sex manns hafa verið felld í tveimur aðskildum atvikum.
Atvikið átti sér stað daginn eftir að Donald Trump lýsti því yfir að hann hygðist „endurreisa Gasa“ eftir að Ísrael og Hamas skiptust á föngum og gíslum í gær, sem markaði endalok tveggja ára blóðugra átaka á svæðinu.
Bandaríkjaforseti lýsti við það tilefni yfir „nýju upphafi fyrir öll hin fögru Mið-Austurlönd“ þegar hann skrifaði undir friðarsamkomulagið í Egyptalandi ásamt vestrænum og arabískum leiðtogum.
En þegar hann ræddi við blaðamenn að fundinum loknum í Sharm el-Sheikh forðaðist hann að taka afstöðu til palestínsks ríkis:
„Ég er ekki að tala um eitt ríki eða tvö ríki, við erum að tala um endurreisn Gaza,“ sagði Trump.
Ísraelskir fjölmiðlar: Allir sem stíga yfir ósýnilegu línuna eru í hættu
Samkvæmt frétt frá Kan, ríkisfjölmiðli Ísraels, virðist ísraelski herinn skjóta á hvern þann sem fer yfir svokallaða ósýnilega „gula línu“, þar á meðal óvopnaða borgara.
Í fréttinni kemur fram að herinn hafi beitt árásarþyrlu og skriðdreka sem „aðvörunarskotum“ gegn Palestínumönnum sem gengu „fótgangandi út fyrir gula línuna“, og síðar notað dróna til að ráðast á þá og drepa.
Ísraelskir fjölmiðlar greindu einnig frá því að „hver sem fer yfir línuna sé einfaldlega dæmdur til dauða“, og að líklegt væri að „slík atvik muni halda áfram“.
Fréttaritari Kan bætti við að frásagnir um „hryðjuverkahóp“ væru rangar:
„Árásirnar beinast ekki allar að vopnuðum hryðjuverkamönnum,“ sagði hann.
Yfirlýsing frá ísraelska hernum
Ísraelski herinn (IDF) gaf síðar út formlega yfirlýsingu um atvikið:
„Fyrr í dag voru nokkrir grunaðir aðilar spottaðir þegar þeir fóru yfir gula línuna og nálguðust hermenn IDF sem starfa í norðurhluta Gaza, sem telst brot á samkomulaginu,“ sagði í yfirlýsingunni
„Reynt var að fjarlægja grunaða einstaklinga án árásar, en þeir hlýddu ekki fyrirmælum og héldu áfram að nálgast hermennina, sem þá hófu skothríð til að fjarlægja ógnina.“
„Fréttir um að hryðjuverkamenn hafi brotist inn á stöð IDF eru rangar. IDF hvetur íbúa Gaza til að fylgja fyrirmælum hersins og halda sig fjarri svæðinu þar sem hermenn eru staðsettir.“
Á þeim tveimur árum sem árásirnar á Gaza stóðu yfir drápu Ísraelar að minnsta kosti yfir 60.000 Palestínumenn, þar af að minnsta kosti hátt í 18.000 börn, þó margir telji raunverulegan fjölda dauðra mun hærri.
