Leikkonan Shannon Elizabeth, sem naut mikilla vinsælda sem kyntákn í Hollywood snemma á 21. öld, hefur ákveðið að hefja starfsemi á áskriftarveitunni OnlyFans. Aðgangur að reikningi hennar var opnaður í dag.

Elizabeth sló í gegn fyrir hlutverk sín í kvikmyndunum American Pie, Scary Movie og Jay and Silent Bob Strike Back, þar sem hún festi sig í sessi sem ein þekktasta leikkona sinnar kynslóðar.

Í viðtali við tímaritið People segir Elizabeth að ákvörðunin marki nýtt skeið á ferli hennar. Hún kveðst vilja taka meiri stjórn á eigin ímynd og efni.

„Ég hef eytt allri minni starfsævi í Hollywood þar sem aðrir stjórnuðu frásögninni og útkomunni. Þessi nýi kafli snýst um að breyta því, sýna nýja og meira kynþokkafulla hlið og komast nær aðdáendum mínum,“ segir hún.

Hún bætir við að hún telji vettvanginn bjóða upp á meira frelsi en hefðbundinn kvikmyndaiðnaður. „Ég valdi OnlyFans vegna þess að þar get ég tengst beint við áhorfendur, skapað á mínum eigin forsendum og verið frjáls. Ég tel að þetta sé framtíðin,“ segir Elizabeth.