Sterk og óþægileg lykt frá starfsemi Colas Íslands við Suðurhöfn í Hafnarfirði hefur valdið íbúum í nágrenninu miklum ama undanfarin ár. Samkvæmt upplýsingum frá Heilbrigðiseftirliti höfuðborgarsvæðisins má rekja lyktina til um fimm þúsund tonna bikfarms sem fyrirtækið fékk afhentan í febrúar en RÚV greinir frá málinu.

Hörður Þorsteinsson, framkvæmdastjóri Heilbrigðiseftirlits höfuðborgarsvæðisins, segir að tugir kvartana hafi borist vegna málsins á síðustu fimm árum. Hann segir lyktina sérstaklega leggja yfir íbúðahverfi ofan við Suðurhöfn þegar ákveðnar vindáttir eru ríkjandi eða þegar logn er.

„Þessi ólykt er óþolandi,“ segir Hörður.

Björk Úlfarsdóttir, sviðsstjóri hjá Colas, segir að vandinn hafi fyrst komið upp árið 2021 þegar fyrirtækið fékk bikfarm sem lyktaði illa. Nýr farmur sem barst í febrúar sé þó enn verri. Hún segir lyktina hvimleiða en ekki heilsuspillandi.

Colas hefur hafið rannsókn á eðli lyktarinnar í samstarfi við rannsóknarstofu í Frakklandi og vinnur jafnframt að kaupum á nýjum hreinsibúnaði. Að sögn Bjarkar er stefnt að því að leysa vandann endanlega eigi síðar en á næsta ári.