Þriggja herbergja einbýlishús á Selfossi hefur verið sett á sölu fyrir 63,9 milljónir króna. Um er að ræða 69,4 fermetra timburhús sem byggt var árið 1959 og hefur verið mikið endurnýjað.

Húsið er klætt bárujárni að utan og er staðsett skammt frá helstu þjónustu á Selfossi. Verslanir, sundlaug og miðbær bæjarins eru meðal annars í göngufæri frá eigninni.

Í húsinu eru tvö svefnherbergi, stofa, eldhús, baðherbergi og rúmgóð forstofa. Forstofan er með kalksparsli á gólfi en í stofu og svefnherbergjum hefur verið lagt nýlegt harðparket.

Stofan er björt og rúmgóð. Í eldhúsinu er grálökkuð innrétting ásamt ofni og helluborði frá Hisense. Þar er einnig frístandandi ísskápur og aðstaða fyrir borðkrók.

Hjónaherbergið er rúmgott og þar eru tveir fataskápar. Annað svefnherbergi hússins er minna og einnig með nýlegu harðparketi.

Baðherbergið er rúmgott og þar er bæði sturta og baðkar. Þar er jafnframt upphengt salerni og innrétting.

Fyrir framan húsið er verönd þar sem komið hefur verið fyrir rafmagnsheitapotti. Potturinn er búinn sjálfvirkri Danfoss-stýringu.

Ásett verð eignarinnar er 63,9 milljónir króna, sem jafngildir rúmlega 920 þúsund krónum á fermetra miðað við skráða stærð hússins.