Fyrrverandi forsætisráðherra, Bjarni Benediktsson, var dreginn inn í umræðuna um útifund þjóðernissinna á Austurvelli um helgina, þegar hann var beðinn að „setja tappa í tengdasoninn“, ClubDub-popparann Brynjar Barkarson. Einhverjum stuðningsmönnum Bjarna, eins og Elliða Vignissyni, bæjarstjóra Ölfuss, þótti ósmekklegt að nota fjölskyldutengsl gegn Bjarna, sem varð reyndar að hætta sem forsætisráðherra og aftur sem fjármálaráðherra vegna fjölskyldutengsla.
Bjarni er ekki alveg ókunnugur áhyggjum af útlendingum á Austurvelli. Í janúar í fyrra sagði Bjarni, þá forsætisráðherra, að það væri „hörmung að sjá tjaldbúðir við Austurvöll“, þegar fólk mótmælti þar árásum á almenna borgara á Gazasvæðinu og tregðu íslenskra stjórnvalda til að liðsinna með fjölskyldusameiningu þeirra sem þar voru í hættu stödd.
Bjarni viðhafði engin orð um hörmung á Austurvelli eftir fund þjóðernissinna, þar sem tengdasonur hans talaði um ógnina sem stafaði af útlendingum og „uppsprettu illsku“.
Eins og Bjarni hefur Brynjar áhyggjur af Evrópusambandinu og vinstri mönnum. Meðfylgjandi myndskeið af viðtali við Brynjar í þætti Þórarins Hjartarsonar, Einni pælingu, hefur vakið mikla athygli fyrir djúpar samsærispælingar Brynjars. „EU er stórlega spillt. Það er verið að koma kommúnisma í vestrænan heim,“ sagði Brynjar og bætti við á upprunarekjanlegri íslensku: „Það er verið að breyta vestrænum heimi í second world countries,“ vegna þess að „elites vilja stjórna“.
Þannig hljómar Brynjar svolítið eins og Temu-útgáfan af Bjarna Benediktssyni.
Bjarni Benediktsson hins vegar velur sér ekki tengdason, ekki frekar en aðrir íslenskir feður. Ef það væri þannig hefðu áhyggjur Brynjars fyrst orðið að veruleika, með einhvers konar nauðungarsambandi í ætt við Sharía-lög.
