Nýr pakki af svonefndum „Epstein-skjölum“ inniheldur fjölda tilvísana í Donald Trump, þar á meðal fullyrðingu háttsetts saksóknara um að forseti Bandaríkjanna hafi flogið mun oftar með flugvél hins dæmda barnaníðings, Jeffrey Epstein, á tíunda áratug síðustu aldar, en áður hefur verið talið, þar á meðal verið í flugi með Epstein og 20 ára gamalli konu.

Engar upplýsingar liggja fyrir um hvort konan hafi verið þolandi einhvers glæps, og að nafn hennar komi fram í skjölunum þýðir ekki að hún hafi verið viðriðin neitt saknæmt.

Birting skjala frá dómsmálaráðuneytinu fylgir sambærilegri útgáfu í síðustu viku, þegar hluti skjala um rannsóknir á málefnum auðkýfingsins var gerður opinber.

Í skjölunum er að finna fjölmargar tilvísanir til Trump, meðal annars í tölvupósti sem bendir til þess að hann hafi ferðast með einkaþotu Epstein með konum sem gætu hafa verið vitni í máli gegn aðstoðarkonu Epstein, Ghislaine Maxwell. Þotan hefur verið kölluð Lolita Express.

Tölvupósturinn, sendur af saksóknara suðurhluta New York-ríkis 7. janúar 2020, bar yfirskriftina „Epstein flight records“ (flugskrár Epstein).

Í honum segir: „Til upplýsinga vil ég láta vita að flugskrárnar sem við fengum í gær sýna að Donald Trump ferðaðist með einkaþotu Epstein miklu oftar en áður hefur verið greint frá (eða sem við vissum af), þar á meðal á tímabilinu þar sem við myndum búast við að leggja fram ákærur í Maxwell-málinu.

„Hann er sérstaklega skráður sem farþegi í að minnsta kosti átta flugum á árunum 1993 til 1996, þar á meðal að minnsta kosti fjórum flugum þar sem Maxwell var einnig um borð. Hann er skráður hafa ferðast með meðal annars annarri eiginkonu sinni, Marlu Maples, dóttur sinni Tiffany og syni sínum Eric á mismunandi tímum.

„Í einu flugi árið 1993 eru hann og Epstein einu skráðu farþegarnir; í öðru flugi eru einu farþegarnir Epstein, Trump og þá hin tvítuga [svert]. Í tveimur öðrum flugum voru tveir farþegar, í hvoru tilviki, konur sem gætu hafa verið vitni í Maxwell-málinu.“

Í nýja skjalapakkanum eru einnig fjölmargar tilvísanir til Andrew Mountbatten-Windsor, áður þekktur sem Andrés prins.

Trump lofaði því í kosningabaráttu sinni í fyrra að gefa út Epstein-tengd skjöl. Í sumar varð stjórn hans fyrir mikilli gagnrýni þegar dómsmálaráðuneytið tilkynnti að það myndi ekki birta nein skjöl tengd hinum látna barnaníðingi og sagði að enginn „saknæmur viðskiptavinalisti“ hefði fundist, þvert á yfirlýsingar Pam Bondi, þáverandi dómsmálaráðherra Flórída, sem sagðist hafa slíkan lista á skrifborðinu sínu.

Tilkynningin vakti víðtæka reiði frá báðum pólum, þar á meðal meðal sumra stuðningsmanna Trump, og endurvakti athugun á fyrri tengslum Epstein og Trump, sem voru vinir í að minnsta kosti 15 ár áður en það slettist upp á vinskapinn árið 2004. Forsetinn hefur stöðugt neitað að hafa haft vitneskju um eða aðild að glæpastarfsemi Epstein.