Séra Davíð Þór Jónsson er talinn líklegur til að leiða stjórnmálaflokk á vinstri vængnum eftir því sem heimildir Mannlífs herma.
Er talið líklegt að hugmyndin hafi sprottið upp eftir að sundrung í Sósíalistaflokknum kom upp, og þá var fylgishrun Vinstri grænna og Pírata sem vatn á myllu þeirra sem vilja sameiningu vinstri flokkanna undir öðru heiti.
Hvort Gunnar Smári Egilsson standi á bakvið Davíð Þór er enn óljóst en margt sem bendir til þess.
Nú um stundir er Davíð Þór í fríi á Spáni með fjölskyldu sinni og vildi ekkert tjá sig um stöðuna.
Davíð Þór var á meðal þeirra er lýst hafa yfir óánægju með gang mála hjá Sósíalistaflokknum en hann var sjálfur í fyrsta sæti á framboðslista flokksins í Suðvesturkjördæmi í alþingiskosningunum í nóvember síðastliðnum.
Hann sagði eftir allt rótið hjá Sósíalistum að „það sem kom fyrir var að ákveðnir einstaklingar höfðu gert tossalista yfir það hvernig ætti að kjósa. Allar kosningar fóru upp á punkt og prik eftir þessum tossalista og það var náttúrulega til höfuðs ákveðnum einstaklingi skulum við segja“ sagði Davíð Þór á sínum tíma og staðfesti að umræddi maðurinn væri „Gunnar Smári.“
Sagði Davíð Þór einnig að „hann [Gunnar Smári Egilsson, innskot blm] náði ekki kjöri, og einstaklingar sem höfðu starfað of náið með honum náðu ekki kjöri, þrátt fyrir að það séu einstaklingar sem flokkurinn á líf sitt að launa. Þau guldu þess að vera ekki í ónáð hjá Gunnari Smára.“
Davíð Þór sagðist ekki vita „hvernig þetta fólk ætlar að fara reka þennan flokk eftir að hafa hafnað einstaklingum sem hann stendur í svona mikilli þakkarskuld við.“
Hann sagði líka að „það verða eftirmálar af þessum skrípaleik sem ungliðahreyfingin bauð upp á undir yfirskrift lýðræðis. En það mun koma í ljós hver þau verða.“
Þótt Davíð Þór baði sig á ylvolgum ströndum Spánar þar sem glampar sólarinnar gefa ákveðnum litbrigðum lífsins mögulega meiri snerpu segir hann þó sjálfur að hann liggi undir feldi og þurfi að hugsa sinn gang.
Fari svo að Davíð Þór og Gunnar Smári stofni stjórnmálaflokk saman er ljóst að sá flokkur verður hávær, umdeildur og hugmyndaríkur.
