Framganga Eimskipafélags Íslands í að eyða skipum í Asíu var reifuð í þætti Kveiks. Sláandi upplýsingar voru lagðar fram um þann skollaleik sem átti sér stað við að koma skipunum í gegnum fyrirtækjaflækju á eyðingarstað þar sem vafasamt fyrirtæki eyðir skipum með hætti sem er ekki samþykktur í alþjóðasamfélaginu og fara fram hjá reglum sem gilda um slíkt. Forstjóri Eimskips, Vilhelm Þorsteinsson, neitaði að tjá sig við Kveik um þáttinn og lét ekki ná í sig.
Vilhelm er af annarri kynslóð Samherjamanna en faðir hans, Þorsteinn Vilhelmsson þáverandi skipstjóri, var lykilmaður í upphafi en fór úr félaginu eftir deilur við frænda sinn Þorstein Má Baldvinsson. Þorsteinn skipstjóri hefur á sér orð fyrir að vera heiðarlegur og hefur hvergi komið nálægt Namibíumálum Samherja. Vilhelm er augljóslega í vanda vegna málsins og þess að hafa smeygt sér framhjá alþjóðlegum reglum og lögum við eyðingu skipanna tveggja.
Stærstu eigendur Eimskips eru íslenskir lífeyrissjóðir sem hafa undirgengist stranga umhverfisstefnu. Stærsti einstaki eigandinn er Samherji Holding. Enn og aftur dregst Samherji inn í mál sem skaðar orðspor þeirra. Einhverjir kynnu að telja að ekki væri á bætandi ofan á Namibíumálið þar sem ásakanir um mútur eru á borðinu.
Nú er beðið eftir viðbrögðum lífeyrissjóðanna vegna Eimskips, sem eitt sinn var óskabarn þjóðarinnar. Hermt er að innan lífeyrissjóða sé fólki ekki skemmt ….
Athugasemdir