Eigandi kynlífsherbergis í miðborginni hefur auglýst reksturinn til sölu á sölusvæðinu Brask og brall á Facebook. Ásett verð eru tæpar 30 milljónir króna.
Ef marka má viðbrögð við auglýsingunni sem birtist í gærkvöldi þá virðist talsverður áhugi á kynlífsherberginu. Verið er að selja húsnæðið sjálft sem telur eitt fullinnréttað kynlífsherbergi og annað tómt rými ásamt rekstri vefsíðunnar sexroom.is. Innréttaða rýmið er herbergi sérútbúið kynlífstækjum, rólu og bekk, auk rúms og baðherbergis. Í skilmálum vefsíðunnar er meðal annars tekið fram að gestir megi vera að hámarki þrír í einu og að enginn undir átján ára aldri geti pantað herbergið.
Í sumar ræddi eigandi herbergisins við Mannlíf. Þar kom fram að fyrsti klukkutíminn kosti 15.000 krónur og eftir það lækkar verði í 6.000 krónur fyrir hverja auka klukkustund. Þrif á herberginu eru innifalin í verðinu. „Við opnuðum fyrir þjónustuna fyrir svona mánuði síðan og viðbrögðin hafa verið góð hjá þeim sem hafa prófað herbergið. Fólk er mjög ánægt með hvað aðstaðan er hrein og snyrtileg og hvað þetta er allt saman pró. Fólki finnst þetta vera alveg til fyrirmyndar. Tilgangurinn með þessu er að þarna hafi fólk frelsi til að krydda kynlífið sitt. Úti í heimi eru heilu hótelin sem bjóða upp á svona þjónustu. Þetta ætti ekki að vera eitthvert feimnismál,“ sagði eigandinn sem sjálfur óskaði nafnleyndar.
Í auglýsingunni er fullyrt að fyrir réttan aðila geti þessi rekstur blómstað. Ef þú hefur áhuga á að kaupa kynlífsherbergið þá getur þú gert það með því að senda tölvupóst á netfangið [email protected].
Athugasemdir