Vigdîs Hauksdóttir, borgarfulltrúi Miðflokksins, hefur ákveðið að gefa ekki kost á ser að leiða flokkinn í sveitastjórnarkosningunum sem framundan eru.
Þetta kemur fram í tilkynningu Vigdísar á Facebook. Hún segir ástæðurnar vera nokkrar fyrir brotthvarfi sinu og til að skýra betur hvers vegna skulum við gefa Vigdísi orðið:
“Kæru stuðningsmenn og Reykvíkingar
Ég þakka ykkur fyrir að veita mér brautargengi í Alþingiskosningum 2009 og 2013 og borgarstjórnarkosningum 2018.
Að sitja í tæp tólf ár sem kjörinn fulltrúi í umboði ykkar hefur verið afar lærdómsríkt og ekki síður gefandi.
Ég hef alltaf sagt að vika er langur tími í pólitík og hef nú tekið ákvörðun um að sækjast ekki eftir að leiða Miðflokkinn í borgarstjórnarkosningum í vor.
Ástæðurnar eru margar.
Í fyrsta lagi hefur kjörtímabilið verið mjög krefjandi pólitískt séð. Ég hef flett ofan af fjármálasukki í fjölda málaflokka í borgarrekstrinum án nokkurra afleiðinga fyrir borgarstjóra og meirihlutann.
Í öðru lagi er fjárhagsstaða Reykjavíkur komin langt yfir hættumörk. Skuldirnar eru stjarnfræðilegar og áætlað er að þær verði 240 milljarðar í árslok 2026. Þar af er búið að skuldsetja næsta kjörtímabil upp á 92 milljarða samkvæmt lántökuáætlun. Það er sérlega ósvífið.
Í þriðja lagi þá hefur viðhald skólahúsnæðis verið ófullnægjandi og grunnskólabörn eru á hrakhólum út um alla borg. Ekki hefur verið staðið við uppbyggingu leikskóla og borginni er haldið í heimatilbúnum lóðaskorti sem leiðir til fasteignaverðs í hæstu hæðum.
Í fjórða lagi bendir ekkert annað til þess en að borgarstjóri ætli sér að halda völdum með einhverjum útfærslum að nýjum viðreistum meirihluta eins og í kosningunum 2014 og 2018.
Ég sé því ekki fyrir mér að nokkuð breytist á næsta kjörtímabili.
Ég met það svo að gagnrýni mín á rekstur borgarinnar með tillögum til úrbóta fái ekki hljómgrunn að kosningum loknum.
Með hlýjum vorkveðjum “
Athugasemdir