Elísabet II Englandsdrottning mætti ekki á páskamessu St. George kapellu í Windsor kastala eins og aðrir meðlimir hinnar konunglegu fjölskyldu. Er þetta annar viðburður hennar í röð sem drottningin aldna missir af.
Aðdáendu konungsfjölskyldunnar sem vonuðust til að sjá Elísabetu II Englandsdrottningu mæta til messu urðu að sætta sig við Karl Bretaprins og fleiri meðlimi fjölskyldunnar í páskamessunni þetta árið. Hin 95 ára drottning missti einnig af messu í sömu kapellu þann 14 apríl en mætti þó á þakkargjörðarmessu til heiðurs Filippusar prins, eiginmanns hennar þann 29 mars en hann lést 99 ára að aldri í apríl í fyrra.
Ekki hefur verið gefin upp ástæða fyrir fjarveru drottningarinnar en í október í fyrra eyddi hún nótt á sjúkrahúsi þar sem hún gekkst undir einhversskonar skoðun og í nóvember tognaði hún í baki. Þá greindist hún með Covid-19 í febrúar á þessu ári.
Athugasemdir