Anna Kristjánsdóttir segir að sumarið sé farið í Paradís, ekki sé þar meira en 22 gráður.
Eins og alþjóð veit orðið, skrifar Anna Kristjánsdóttir launfyndnar dagbókarfærslur frá Tenerife og birtir á Facebook, en þangað flutti hún fyrir nokkrum árum. Hina spænsku eyju kallar hún Paradís og er nokkuð tíðrætt um veðurfarið enda lesendahópurinn íslenskur og því áhugasamur um slíkt.
Í færslunni segir Anna að sumarið sé farið, þrátt fyrir að hafa haldið því fram fyrir nokkrum dögum að það væri komið til Paradísar. Í gær segir hún að hitinn hafi rétt slefað upp í 22 gráðurnar. Þá talaði hún einnig um vinnu verkamanna við að koma upp nýju sóltjaldi eftir að hið fyrra hafði fokið í vetur og um Eric nokkurn sem dreymir um að strauja hár hennar.
Sjón er sögu ríkari:
„Dagur 1331 – Sumarið er farið.
Sumarið er farið, það fraus í hylnum.Um daginn hélt ég því fram að sumarið væri komið, enda kom gott Calima og hitinn rauk upp í 34°C sem er mjög óvenjulegt fyrir Tenerife, en nú er öldin önnur. Hitinn rétt marði 22°C í gær og fór niður í 15°C í nótt með einhverri rigningu. Ekki veit ég hvaða Íslendingar tóku kuldann með sér suður á bóginn, en einhverjir gerðu það. Ég fór í svo mikla fýlu að ég er ákveðin í að taka ekki einustu gráðu af hita með mér til Íslands þegar ég fer þangað í vor. En það stefnir samt í sumaryl eftir páska.Að þessu frátöldu, þá mætti maður frá sóltjaldafyrirtækinu til mín til að áætla kostnað við uppsetningu þess eftir að það fauk í vetur og braut stykki úr þakkantinum. Eftir að Sean hafði steypt í þakkantinn að nýju, ákvað ég að láta steypuna þorna vel áður en ég pantaði uppsetninguna að nýju eftir viðgerð á þakkantinum og pantaði tilboð í verkið í fyrradag. Þegar ég heyrði verðið á uppsetningunni gat ég ekki annað en farið að hlæja, enda hafði ég búist við allt að þúsund evru reikning (eigandi íbúðarinnar borgar). Áætlað verð reyndist innan við þriðjungur af minni áætlun og þegar haft er í huga hve starfmenn þessa fyrirtækis eru góðir og nákvæmir, líka hvað tímasetningu snertir, þá eiga þeir skilið aukabónus fyrir verkið. (Ég skal borga bónusinn).Ég viðurkenni alveg að ég hefði alveg getað sagt markisur, en hreintungustefnan bannar mér slíkt. Það er margoft búið að skamma mig fyrir að nota komplex fyrir svona fjölbýli eins og er hér þar sem eru um 200 íbúðir í sjö hlutum fjölbýlisins auk nokkurra bara og veitingahúsa, einnar verslunar og einnar hárgreiðslustofu þar sem hún Roberta mín rak áður en hún veiktist. Ég bíð þess enn að hún mæti aftur til starfa og geri hárið mitt eins og áður, en Eric frændi minn frá Írlandi á stofunni í næsta húsi er einstaklega áhugasamur um að strauja á mér hárið og ég er ekki sátt við slíkt.Svo mörg voru þau orð.“
Athugasemdir