Það fer vel á því á kvennafrídaginn að Guðrún Hafsteinsdóttir tekur við embætti dómsmálaráðherra af Jóni Gunnarssyni. Eftir langa mæðu og vandræðagang varð loks niðurstaða Bjarna Benediktssonar, formanns Sjálfstæðisflokksins, sú að standa við loforðið sem hann gaf við upphaf kjörtímabilsins þegar hann sagði að Jóni yrði skipt út fyrir Guðrúnu. Margir eru ósáttir við að láta Jón fara en hann hefur þótt kraftmikill í embætti þótt sumum hafi þótt orka hans fara til verka sem voru til óþurftar.
Guðrún hefur hreina pólitíska áru og þykir heiðarleg og fylgin sér. Það þykir spennandi að sjá hvernig Guðrún tekur á málum í ráðuneytinu, jarðsprengjusvæði sem kostað hefur pólitískt líf forvera hennar, Hönnu Birnu Kristjánsdóttur og Sigríðar Andersen.
Guðrún ráðherra býr í Hveragerði og hefur ekið til vinnu í Reykjavík á eigin bíl. Nú segja gárungarnir að hún mæti að vanda á Skodanum í vinnuna en haldi heim á ráðherrabíl í dagslok…
Athugasemdir