„Sagan af því þegar Ísland fékk NÆSTUM að heyra upptöku af því þegar Ásmundur Einar mennta- og barnamálaráðherra kom upp um sinn innri pervert.“ Svo hljóðar byrjun á færslu sem frænka Ámunda Sigurðssonar en þar segir hún frænda sinn og Ásmund Einar Daðason hafa haft uppi „óheflað kynferðislegt tal“ um bandaríska körfuboltakonu er þeir sóttu hana á Keflavíkurflugvöll en hún var þá nýráðin til Skallagríms. Málið hefur áður komið upp en meint myndbandið virðist horfið.
Færslan
Sandra Sjafnar, systurdóttir Ámunda Sigurðssonar, fyrrum formanns meistaraflokksráðs kvenna hjá Skallagrími, skrifaði eldfima færslu á Facebook í fyrradag þar sem hún segir þá Ámunda og Ásmund Einar Daðason, núverandi barnamálaráðherra og fyrrverandi formanns kvennaráðs Skallagríms, hafa birst á myndbandi bandarískrar körfuboltakonu þar sem töluðu saman á íslensku og töluðu kynferðislega um leikmanninn sem var í aftursætinu. Körfuboltakonan, sem lék með Skallagrími tímabilið 2016-2017, ku hafa verið að taka upp myndband af náttúrunni á Reykjanesinu og náð fyrir slysni tali þeirra Ámunda og Ásmundar. „Atvikalýsing sem mér og fleirum barst í skilaboðum á samfélagsmiðlum árið 2015 hljómaði þannig, að Ásmundur og Ámundi hefðu sótt unga bandaríska körfuboltakonu á Keflavikurflugvöll árið 2015 og setið með henni í bíl sem keyrði þau í Borgarnes,“ skrifaði Sandra í færslunni og hélt áfram: „Körfuboltakonan unga var að vonum spennt fyrir íslensku umhverfi í bílferðinni og tók upp myndband af landslaginu á Ipadinn sinn. Hún skildi auðvitað ekki orð í íslensku, sem Ásmundur og Ámundi nýttu sér til þess að tala andstyggilega og kynferðislega um hana á leiðinni, en sú orðræða náðist fyrir tilviljun á stutta upptöku hennar á meðan hún dáðist að landslaginu. Þeir heyrðust meðal annars ræða um húðlit hennar og töluðu óheflað um kynferðislegar og jafnvel ofbeldisfullar langanir sínar í því samhengi til hennar og hlógu.“
Sandra sagði í færslunni að körfuboltakonan hafi sent upptökuna á liðsfélaga sína á samfélagsmiðlum, án þess að vita um samtalið sem hún náði á myndband. „Upptakan fór þó í einhverja dreifingu á samfélagsmiðlum en ekki þannig að margir hafi náð að vista upptökuna. Ég er ein af þeim sem sá upptökuna en vistaði hana ekki. Réttlætis- og siðferðiskennd minni var gersamlega misboðið og árið 2018, þegar hegðun Ámunda gagnvart þjálfara Skallagríms var til umfjöllunar í fjölmiðlum, átti ég samskipti við blaðamann DV um að koma innihaldi upptökunnar í umfjöllun. DV birti þá frétt um upptökuna og tilkynnti að nánari umfjöllun um hana væri væntanleg. Stuttu síðar hvarf sú frétt af vefnum eins og margir muna og aldrei fékkst nein skýring á því hvers vegna ekki varð af umfjölluninni.“
Útskýring Kristjóns Kormáks
Mannlíf ræddi við Kristjón Kormák Guðjónsson, þáverandi ritstjóra DV og spurði hann út í hvarf fréttarinnar af myndskeiðinu. Vildi Kristjón Kormákur meina að um mistök blaðamannsins hefði verið að ræða. Staðfesti Kristjón að hann hefði unnið að frétt um myndband þar sem kynferðislegt tal heyrist um dökka körfuknattleikskonu Skallagríms, milli Ámunda og Ásmundar, en Ámundi hafi verið sá sem talaði mest á þeim nótum. „Samkvæmt okkar heimildum var Ámundi sá sem hafði sig mest í frammi með sóðakjaftinn en Ásmundur hafi ekki stoppað hann en sagt já og nei og slíkt,“ sagði Kristjón í samtali við Mannlíf að vinnuskjal um fréttina hefði óvart farið á fréttavefinn. Varðandi fréttina um málið sagði Kristjón að hann hefði verið að vinna að frétt um myndbandið, eftir að hafa talað við fjöldi manns sem sagðist hafa séð það, á laugardegi með öðrum blaðamanni. „Það sem gerist er að ég tel mig vera kominn á sporið og er að vinna í þessu með öðrum blaðamanni á laugardegi og ég bið annan blaðamann, sem var á helgarvakt, en þá var ég að hringja og tala við fólk um málið. Ég bað hann að taka saman punkta um málið og setja það í skjal. Blaðamaður minn gerir þau mistök að hann fer inn á kerfið okkar og þar skrifar hann langa fyrirsögn, með fullt nafn Ásmundar Einars en við birtum aldrei fullt nafn í fyrirsögn. Og við settum aldrei í loftið frétt bara með DV lógóinu.“ Sagði Kristjón að vinnuskjalið hefði farið í loftið í eina eða tvær sekúndur en að það hefði verið nóg því félagi hans hefði sent honum skjáskot af fyrirsögninni skömmu síðar. Sagðist Kristjón hafa verið algjörlega miður sín yfir mistökunum enda hafi þetta verið eitthvað sem hann var ekki búinn að fá algjörlega staðfest og gat ekki fullyrt um að hefði í raun gerst. Kristjón sagðist hafa beðið eftir því að vera kallaður á teppið hjá Karli Garðarssyni, framkvæmdarstjóra DV á þeim tíma og Framsóknarmanni en allt kom fyrir ekki, ekkert heyrðist frá honum vegna mistakanna. Þá hringdi að sögn ritstjórans, Ásmundur Einar ekki heldur í hann vegna málsins líkt og hann bjóst við.
Staðfesting körfuboltakonunnar
Mannlíf ræddi við körfuknattleikskonuna, Tavelyn James (þá Tillman) og fékk staðfest frá henni að hún hefði verið beðin um að eyða myndbandi sem hún tók í bíl þegar þeir Ásmundur Einar og Ámundi sóttu hana á Keflavíkurflugvöll. „Þeir buðu mér aldrei pening til að eyða myndbandinu. Þeir báðu mig að eyða því og ég gerði það ekki en þá bað ein dóttir hans mig að eyða því og sagði að þeir hefðu verið að tala um pólitík.“ Sagðist hún aldrei hafa fengið aðra útskýringu á því sem þeir höfðu verið að ræða í myndbandinu.
Sjá einnig: Körfuboltakonan lýsir heimsókn eftir tapleik gegn Keflavík: „Little black nigger bitch“
Svör Ásmundar og Ámunda
Aðspurður sagði Ásmundur Einar Daðason að um „gamla sögu“ væri um að ræða. „Þetta er mjög gömul saga sem ég kannast bara ekki við og varð einhvern veginn til sem kjaftasaga,“ svaraði Ásmundur en þegar blaðamaður tjáði honum að Tavelyn hefði staðfest að hún hafi verið beðin um að eyða myndbandinu svaraði hann: „Já, ég kannast ekki við að hafa beðið um neitt slíkt. Þannig að þetta er bara mjög gömul saga sem ég kannast ekki við og vísa frá mér.“
Ámundi svaraði á sama hátt um færslu frænku sinnar: „Hún er lasin stelpugreyið. Ég bara skil ekki hvað er að henni. Ég bara kannast ekkert við þetta vinur minn, ég hef svarað fyrir þetta áður en ég kannast bara ekkert við þetta. Þetta er bara eitthvað kjaftæði.“ Þegar Ámundi var sagt að Tavely hefði staðfest að hafa verið beðin um að eyða myndskeiði svaraði hann: „Það er ekki okkar, það er ekki frá mér að minnsta kosti. Ég kannast ekkert við það. Ég skil bara ekki hvað fólk getur verið ómerkilegt. Þú getur bara skoðað færsluna hjá henni [Söndru Sjafnar] og séð að það eru allir ómögulegir nema hún. Ég er hissa hvað þið eruð duglegir að hlusta á þetta.“
Hér er bútur úr færslu Söndru:
„Ásmundur Einar núverandi barnamálaráðherra var formaður kvennaráðs hjá Skallagrími árin 2015-2017. Atvikalýsing sem mér og fleirum barst í skilaboðum á samfélagsmiðlum árið 2015 hljómaði þannig, að Ásmundur og Ámundi hefðu sótt unga bandaríska körfuboltakonu á Keflavikurflugvöll árið 2015 og setið með henni í bíl sem keyrði þau í Borgarnes. Körfuboltakonan unga var að vonum spennt fyrir íslensku umhverfi í bílferðinni og tók upp myndband af landslaginu á Ipadinn sinn. Hún skildi auðvitað ekki orð í íslensku, sem Ásmundur og Ámundi nýttu sér til þess að tala andstyggilega og kynferðislega um hana á leiðinni, en sú orðræða náðist fyrir tilviljun á stutta upptöku hennar á meðan hún dáðist að landslaginu. Þeir heyrðust meðal annars ræða um húðlit hennar og töluðu óheflað um kynferðislegar og jafnvel ofbeldisfullar langanir sínar í því samhengi til hennar og hlógu. Unga konan sendi upptökuna á liðsfélaga sína á samfélagsmiðlum, grunlaus um kynferðislegar og grófar athugasemdir um hana, uppruna og útlit, í tali mannanna í bakgrunni. En þau sem sáu upptökuna skildu auðvitað íslensku og heyrðu munnsöfnuð mannanna sem þau báru kennsl á sem Ámunda og Ásmund Einar, í bakgrunni. Upptökunni var eytt af samfélagsmiðli ungu konunnar fljótlega eftir að hún var birt, um leið og stelpan var komin á leiðarenda í Borgarnes.
Það kann að vekja undrun eða efasemdir að allar stelpurnar í körfuboltanum hafi kosið að þegja yfir því sem þær heyrðu á upptökunni í öll þessi ár, vitandi að sjálfur ráðherra velferðar og barnaverndar á Íslandi talaði svona um unga konu. Það að allar dætur hans Ámunda voru í körfuboltaliðinu hjá Skallagrími á þessum tíma gæti þó útskýrt þögn þeirra að einhverju leyti, en þó gæti vel verið að fleira liggi þar að baki. Í þessu samhengi kemur það ef til vill ekki neinum á óvart að ein af dætrum Ámunda var ráðin í ábyrgðarstöðu innan ráðuneytis Ásmundar árið 2021. Ég skal ekki segja hvort hún hafi verið sú hæfasta í hlutverkið, en samkvæmt mínum heimildum var það einmitt umrædd dóttir Ámunda sem fékk bandarísku körfuboltakonuna til að eyða upptökunni af samfélagsmiðlum þegar hún kom í Borgarnes á sínum tíma.Upptakan fór þó í einhverja dreifingu á samfélagsmiðlum en ekki þannig að margir hafi náð að vista upptökuna. Ég er ein af þeim sem sá upptökuna en vistaði hana ekki. Réttlætis- og siðferðiskennd minni var gersamlega misboðið og árið 2018, þegar hegðun Ámunda gagnvart þjálfara Skallagríms var til umfjöllunar í fjölmiðlum, átti ég samskipti við blaðamann DV um að koma innihaldi upptökunnar í umfjöllun. DV birti þá frétt um upptökuna og tilkynnti að nánari umfjöllun um hana væri væntanleg. Stuttu síðar hvarf sú frétt af vefnum eins og margir muna og aldrei fékkst nein skýring á því hvers vegna ekki varð af umfjölluninni.
Eftir að systurnar þrjár, frænkur Ásmundar Einars Daðasonar, upplýstu um vafasama hegðun og fortíð hans í hlaðvarpinu Lömbin þagna ekki, gróf ég upp samskipti mín við umræddan blaðamann. Ég finn mig knúna til að birta þessi samskipti þó ekki væri nema til þess að renna stoðum undir þann grun systranna þriggja um að Ásmundur kunni að nýta sér valdastöðu sína með óeðlilegum hætti. Ég lít þannig á að almenningur eigi heimtingu á að vita þetta um ráðherra mennta – og barnamála á Íslandi.“
Athugasemdir