Kannanir sem sýna gríðarlega fylgisaukningu Samfylkingar undir stjórn Kristrúnar Frostadóttur þykja vera klár vísbending um að flokkurinn muni tvöfaldast að minnsta kosti í næstu kosningum. Jafnframt liggur fyrir að einungis helmingur núverandi þingflokks mun halda áfram. Helga Vala Helgadóttir hrökklaðist á brott eftir nokkurn núning við ráðandi forystu og sneri aftur í störf sem lögfræðingur. Þá er talið að Oddný Harðardóttir, leiðtogi í Suðurkjördæmi, muni hætta. Ólíklegt er talið að Þórunn Sveinbjarnardóttir, leiðtogi í Kraganum, haldi áfram. Þá standa eftir þingmennirnir Jóhann Páll Jóhannsson og Logi Einarsson sem báðir eru í innsta valdahring formannsins.
Það bíður Kristrúnar nú það vndasama verk að manna framboðslista með fólki sem nær að heilla kjósendur og fylgja eftir meðbyrnum. Nokkrir lukkuriddarar fortíðar hafa gefið frá sér óljós merki um að þeir vilji stökkva á sigurvagn Kristrúnar. Þeirra á meðal eru Björgvin G. Sigurðsson, sem hefur átt í nokkru klandri síðan hann féll af þingi og er ólíklegur til að hala inn atkvæði. Þá er Guðmundur Andri Thorsson, fyrrverandi rithöfundur, sagður vera með vonarglampa í augum. Hann þótti af mörgum vera fremur aðgerðalítill þingmaður og fljótt hefur fennt í spor hans á þingi. Aftur á móti er hann frjór og afkastamikill rithöfundur og einhverjir telja hann betur kominn í þeim geira áfram.
Talið er að Guðmundur Árni Stefánsson, leiðtogi minnihluta bæjarstjórnar Hafnarfjarðar og varaformaður Samfylkingar, sé tilbúinn að leiða flokkinn í Kraganum. Þess er að vænta að framboð hans leggist vel í kjósendur og gefi flokknum nauðsynlegan blæ reynslu og pólitískrar visku. Allt mun þetta ráðast af vilja Kristrúnar sem heldur fast um alla þræði í flokknum …
Uppfært: Í upphaflegri útgáfu Orðrómsins var fullyrt er að Oddný Harðardóttir hefði gefið út að hann ætlaði að hætta. Það er ranghermt. Hún er að hugsa sinn gang.
Athugasemdir