Áslaug Arna Sigurbjörnsdóttir, ráðherra vísinda og háskóla, fór mikinn á fundi sínum hjá Samtökum í sjávarútvegi þar sem hún bókstaflega hraunaði yfir Svandísi Svavarsdóttur sjávarútvegsráðherra. Undir niðrandi orðum um samráðherra sinn birti hún mynd af fórnarlambinu.
Þetta féll í góðan jarðveg hjá sumum fundarmanna sem eru ósáttir við framgöngu ráðherrans varðandi hvalveiðar og samráð við Samkeppnisstofnun um kortlagningu eignatengsla.
Öðrum misbauð enda þykir Svandís hafa staðið fast gegn kröfum smábátamanna um að fá að róa út sumarið. Almennt spurðist framkoma Áslaugar Örnu illa út og var hún víða fordæmd fyrir. Þetta varð til þess að hún missti kjarkinn og var næstum því búin að biðjast afsökunar í undarlegri og loðinni færslu á Facebook.
„Ég byrjaði þó ræðuna á segja sögu af sjálfri mér og vandræðalegum hrakförum mínum þegar ég fór á sjó. Svo sagði ég að það væri freistandi að ræða málefni líðandi stundar, eins og nokkur málefni sem heyra undir matvælaráðherra. Í þeirri umræðu birti ég mynd af matvælaráðherra sem ég hefði betur sleppt og mér þykir það leitt. Það setti orð mín í annað samhengi en ætlunin var,“ skrifaði Áslaug Arna. Þessi orð eru dálítið eins og að gefa út brandarabók með skýringum …
Athugasemdir