Hjá utanríkisráðuneyti Bjarna Benediktssonar skiptir máli hver svarar ekki spurningum fjölmiðla. Mannlíf hringdi í ráðuneytið í fyrradag til að afla upplýsinga um mál Ólafs Ásdísarsonar, sem handtekinn var í Japan eftir að hann barði leigubílstjóra. Óskað var eftir því að fá að ræða við einhvern hjá borgaraþjónustunni. Starfsmaður sem svaraði í símann benti blaðamanni á að senda tölvupóst á almennt tölvupóstfang utanríkisráðuneytisins en gaf einnig upp póstfang Hjördísar nokkurrar sem þar vinnur. Spurningarnar voru sendar á téða Hjördísi en seinna um daginn kom vinsamleg ábending frá upplýsingafulltrúa ráðuneytisins, Ægi Þór Eysteinssyni, um að Mannlíf ætti ekki að senda fyrirspurnir á neinn annan en einmitt hann. Í svarinu sagðist Ægir, sem er þaulreyndur fjölmiðlamaður, senda svar við spurningum blaðamannsins von bráðar.
Og svarið kom von bráðar. Utanríkisráðuneytið gat ekki tjáð sig um einstök mál. Það skiptir greinilega máli hver svarar ekki spurningum blaðamanna hjá utanríkisráðuneytinu. Nú hafa verið senda nýjar spurningar, almenns eðlis, um Íslendinga í Japan en þær voru sendar á Ægi, ekki Hjördísi …
Athugasemdir