Bragi Páll Sigurðarson segir að Bandaríkjamenn sækist í olíu og gas á Gaza og sé alveg sama um Hamas-liða.
Fjölmennt var á mótmælum fyrir utan sendiráð Bandaríkjanna í Reykjavík í gær. Þar var fólk samankomið til að mótmæla þætti Bandaríkjanna í sögulegum morðum Ísraelshers á saklausum borgurum Gaza og Vesturbakkans í Palestínu. Rithöfundurinn umdeildi, Bragi Páll Sigurðarson flutti sannkallaða eldræðu í mótmælunum en þar talar hann um aðkomu Bandaríkjamanna að stríðinu á Gaza. Í ræðunni segir Bragi Páll meðal annars að það sé ekki Hamas sem sé ástæðan fyrir stríðinu, heldur löngun Bandaríkjamanna og Ísraela í olíu- og gas auðlindir sem rithöfundurinn segir að leynist undir og við strandlengju Gaza. „Þar sem Gaza borg stendur ætla þeir svo að byggja stórskipahöfn til þess að stjórna olíu og gas-sölu. Hamas skiptir engu máli. Ekki láta ljúga því að ykkur. Hamas var ekki til þegar landránið hófst árið 1948. Bandaríkin hafa aldrei þurft afsökun fyrir því að drepa saklausa borgara sjálfum sér til framdráttar. En þau eru samt mjög dugleg að búa sér til afsakanir. Hamas er ein af þeim.“
Þá segir hann að Bandaríkin séu „fullorðinn maður að skjóta barn í höfuðið“ en að Ísraelar séu aðeins vísifingurinn sem taki í gikkinn, Bandaríkin séu restin af líkamanum. „Byssan og kúlan í höfði barnsins koma þaðan. Ísrael hreyfir sig ekki nema með samþykki og blessun Bandaríkjanna.“
Eldræðuna má lesa í heild sinni hér fyrir neðan:
„Góðir fundargestir
Nú þegar sprengjum Ísraela rignir daglega yfir saklausa Palestínska borgara er eðlilegt að spyrja hvers vegna við stöndum hér fyrir utan Bandaríska sendiráðið að mótmæla. Ég ætla því að leyfa mér að byrja á því að lesa upp lista yfir þau lönd sem Bandaríkin hafa sprengt í nafni frelsis og lýðræðis frá lokum síðari heimstyrjaldar.Kórea og Kína 1950-53Gvatemala 1954Indónesía 1958Kúba 1959-1961Gvatemala 1960Kongó 1964Laós 1964-73Víetnam 1961-73Kambódía 1969-70Gvatemala 1967-69Grenada 1983Líbanon 1983, 1984Líbía 1986El Salvador: níundi áratugurinnNíkaragva: Níundi áratugurinnÍran 1987Panama 1989Írak 1991Kúveit 1991Sómalía 1993Bosnía 1994, 1995Súdan 1998Afghanistan 1998Júgóslavía 1999Jemen 2002Írak 1991-2015Afghanistan 2001-2015Pakistan 2007-2015Sómalía 2007-8, 2011Jemen 2009, 2011Líbía 2011, 2015Sýrland 2014-2016Og síðast en ekki síst Palestína 1948-2023.En þetta eru ekki bara nöfn á löndum og ártöl. Að baki hverju einasta ártali eru þúsundir, stundum milljónir látinna borgara, alveg eins og þeir sem við sjáum nú á myndum frá Palestínu síðustu tvo mánuði. Húsarústir. Sundursprengdir líkamar. Brostnar vonir. Botnlaus sorg. En af hverju erum við hérna núna? Fyrir utan Bandaríska sendiráðið? Vegna þess að undir og við strandlengju Gaza eru olíu og gas-auðlindir sem Bandaríkjamenn og Ísraelar ætla að ná endanlegum yfirráðum yfir. Þar sem Gaza borg stendur ætla þeir svo að byggja stórskipahöfn til þess að stjórna olíu og gas-sölu. Hamas skiptir engu máli. Ekki láta ljúga því að ykkur. Hamas var ekki til þegar landránið hófst árið 1948. Bandaríkin hafa aldrei þurft afsökun fyrir því að drepa saklausa borgara sjálfum sér til framdráttar. En þau eru samt mjög dugleg að búa sér til afsakanir. Hamas er ein af þeim. Athugum líka, þó þið vitið það eflaust, að Ísrael hegðar sér ekki eins og eðlilegt lýðræðisríki. Þeir eru aðeins framlenging af Bandaríkjunum. Bandaríkin eru fullorðinn maður að skjóta barn í höfuðið. Aðeins vísifingurinn sem tekur í gikkinn er Ísrael. Restin af líkamanum er Bandaríkin. Byssan og kúlan í höfði barnsins koma þaðan. Ísrael hreyfir sig ekki nema með samþykki og blessun Bandaríkjanna. Og þess vegna stöndum við hér.En hvers vegna hefur heimurinn leyft Bandaríkjamönnum að hegða sér svona undanfarna öld? Vegna þess að Bandaríkin hafa sprengt og mútað öllum sem andmæla. Þeir sprengja brúnt fólk og múta hvítu fólki. Þess vegna er friður á Íslandi, því við höfum tekið við mútunum. Þess vegna létust allir vinstri sinnaðir, lýðræðislega kjörnir fulltrúar Suður-Ameríku og Asíu í dularfullum flugslysum, bílslysum og sprengingum. Af því þeir létu ekki kaupa sig. Þannig vann kapítalisminn kalda stríðið, ekki með hugmyndafræðilegum yfirburðum, heldur með morðum. Valdaránum. Þjófnaði. Það er ástæðan fyrir yfirburðum hins svokallaða vesturs frá lokum seinna stríðs. Af því Bandaríkin eru duglegasti vopnaframleiðandi í heimi. Duglegasti vopnanotandi í heimi. Hið kapítalíska kerfi gengur út á arðrán, þjófnað og ofbeldi. Það er ástæðan fyrir þjóðarmorðinu í Gaza, ekki útrýming Hamas, heldur vegna þess að Bandaríkjamönnum langar í eitthvað. Olíu. Land. Aukin völd. Mannslíf skipta þá engu máli. Um leið og þú tekur ekki við mútunum þá tekur þú við sprengjunum. Heimurinn er ekki frjáls. Við erum aðeins frjáls og eins langt og snaran sem Bandaríkin hnýta utan um hálsinn á okkur nær. Og nú er sú snara endanlega að kæfa íbúa Palestínu.“
Mótmæli
Boðað til skyndimótmæla við utanríkisráðuneytið vegna árása á Íran
Leikstjóri verðlaunakvikmyndar neitaði að taka við friðarverðlaunum
Fréttamaðurinn Don Lemon handtekinn vegna mótmæla gegn ICE
Rithöfundar og fræðimenn þrýsta á bresk yfirvöld vegna hungurverkfallsfanga
Ungur mótmælandi í Íran verður tekinn af lífi
Athugasemdir