Jón Viðar Jónsson tekur Egil Helgason á beinið í nýrri Facebook-færslu vegna þess að Kiljustjórnandinn neitar að fjalla um spillingarbók Björns Þorlákssonar.
Sagt var frá því um helgina að Egill Helgason neiti að fjalla um bók Björns Þorlákssonar, Besti vinur aðals, sem fjallar um spillinguna sem viðgengist hefur á Íslandi um árabil.
Færslan hefst á eftirfarandi hátt: „Samkvæmt frétt DV vill Egill Helgason ekki fjalla um nýja bók Björns Þorlákssonar um spillinguna i þjóðfélaginu og hann ætlar ekki heldur að fjalla um hin umdeildu dagbókarskrif Ólafs Ragnars i Kilju sinni. Hann segir að Kiljan eigi ekki að fjalla um svoleiðis leiðindaskræður; það séu bara eðla fagurbókmenntir og jú stundum þjóðleg fræði sem Agli þykja samboðin þættinum. Það skiptir hann sem sé engu þó að bók Björns sé harla likleg til að vekja forvitni fjölmargra sem á þátt hans horfa, bækur af öllu tagi lesa og hafa á þeim skoðun.“
Í næstu orðum sínum segir gagnrýnandinn óvægni, að Egill hafi „drottnað einráður yfir bókaumfjöllun Ríkisútvarpsins“ í fjöldi ára.
„Nú gæti maður skilið að Egill, sem hefur i áraraðir drottnað einráður yfir bókaumfjöllun Rikissjónvarpsins, þótt efnistök hans hafi oft verið gagnrýnd og það með réttu, léti sé annt um fagurfræðilegan hreinleik sins fina þáttar. En þvi miður er málið ekki svo einfalt. Kiljan hefur svo lengi sem ég man eftir verið kynnt sem þáttur um BÆKUR – og á heimasiðu RÚV stendur skýrum stöfum: „Egill og og bókelskir félagar hans fjalla sem fyrr um forvitnilegar bækur af ýmsum toga og úr öllum áttum.“ Verður það vart skilið á annan veg en þann að bækur af öllu tagi séu gjaldgengar i þessum eina þætti sem RÚV heldur nú úti um listræn efni og menningarmál liðandi stundar.“
Stingur Jón Viðar því næst til nýja klausu sem lýsi Kiljunni betur:
„Það má vel vera að Egill og hans bókelsku félagar (sem hann velur að sjálfsögðu einn og óstuddur) hafi gleymt þessari klausu i önnum daganna. En væri þá ekki heiðarlegra gagnvart þjóðinni, sem kostar nú einu sinni Rikisútvarpið að miklu leyti, að breyta henni eitthvað á þessa leið: „Egill og bókelskir félagar hans fjalla sem fyrr um bækur sem þáttarstjóranum þykja af einhverjum ástæðum forvitnilegri en aðrar bækur.“ Það gæfi alltént réttari mynd af þættinum eins og hann er nú orðinn samkvæmt nýjustu stefnulýsingu Egils.“
Að lokum skýtur Jón Viðar létt á Stefán Eiríksson útvarpsstjóra:
„Hinn nýendurráðni útvarpsstjóri myndi kannski taka það til góðfúslegrar athugunar. Naumast vill hann að heimasiða RÚV birti villandi upplýsingar um dagskrána. Og það er jú hann sem stjórnar Útvarpinu – eða er ekki svo?“
Athugasemdir