Birkir rokkar til vinstri – Leggur mikla áherslu á föðurhlutverkið

Í nýjasta þætti Alkasts Þvotta­húss­ins er engin annar en metal­haus­inn, vegan­inn, fem­inist­inn, sam­göngu­hjól­ar­inn og fað­ir­inn Birkir Fjalar Viðarson. 

Birkir er og hefur alltaf verið mikil áhuga­maður um rokktón­list og segir hann í við­tal­inu að rokkið hafi í raun haldið honum á jörð­inni í gegnum hina ýmsu öldu­dali sem lífið hefur upp á að bjóða. Hann heldur sjálfur út útvarps- og hlað­varps­þætti sem heita Stokkið í eld­inn þar sem þung­arokkið er rætt og skil­greint niður í minnstu eindir. 

Birkir er mik­ill eld­móðs­maður og tekur hlut­verk sín og skyldur mjög alvar­lega og kemur það best fram í hlut­verki hans sem faðir þriggja barna. Hann segir það svo mikið verk­efni fyrir sig að mynda þessi nauð­syn­legu tengsl við börnin sín og gefa sig algjör­lega í því ferli. Hann vill meina að allt annað falli á undan tíma og sam­neyti með börn­unum sínum og gerir sér grein fyrir að ef ekki er haldið rétt á spil­inum í þessum málum geti maður sitið uppi með sárt ennið þjak­aður af skömm og sekt­ar­kennd. 

Þetta við­tal breyt­ist fljótt í eins frjáls­legt sam­tal og hugs­ast getur. Gunnar, annar þátt­ar­stjórn­and­inn hafði aldrei hitt Birkir áður og vissu þeir ekk­ert um hvor annan fyrir utan að Birkir segir að honum hafi verið ráð­lagt að fara ekki í við­tal í Þvotta­húsið sökum þess hve mik­ill hat­ari Gunnar væri í garð fem­in­isma og trans­fólks. Gunnari hafði verið lýst fyrir honum sem manni mik­illa og ljótra skoð­ana. Út frá því spannst sam­tal sem er svo hollt að hafa meðal mann­eskja með ólík við­horf til hinna og þess­ara póla sam­fé­lags­ins. 

Í við­tal­inu var svo farið yfir mjög víðan völl og var sem þátt­ar­stjórn­endur og við­mæl­andi hrein­lega gleymdu að bæði hljóð­nemar og mynda­vélar hvíldu á þeim. Guð og trú, draug­sögur, kapital­ismi og fram­tíð manns­ins, geim­verur og heil­agt banda­lag allra sam­fé­laga okkar vetr­ar­brauta var rætt í þaula og ef mynda­vél­arnar hefðu ekki klárað raf­hlöð­urnar hefðu við­talið eflaust dreg­ist langt fram á nótt, svo mik­ill var gals­inn, teng­ingin og rök­ræð­urnar.

Alla þætti Þvotta­húss­ins má nálg­ast á öllum helstu streym­isveitum eins og Spotify.