Erlendum ferðamönnum brá heldur betur í brú þegar þeir gistu á Hótel Duus í Reykjanesbæ í maí en ferðamennir segja eiganda hótelsins hafa brotist inn á herbergi þeirra um miðja nótt.
Ferðamennirnir sögðu frá þessu á Reddit og birtu mynd af meintum eiganda en DV greindi fyrst frá málinu.
„Viðhaldi á herberginu var ábótavant. Vaskurinn var stíflaður og kraninn á sturtunni var brotinn,“ segir annar ferðamaðurinn á Reddit. Voru ferðalangarnir ósáttir við þetta og óskuðu að málið er yrði lagað. „Í kringum miðnætti kom maður inn á herbergið án þess að banka,“ hélt ferðamaðurinn áfram. „Hann sagðist vera eigandinn og sagðist hafa rétt til þess að koma inn á herbergið hvenær sem honum sýndist. Okkur fannst öryggi okkar verulega ógnað, sérstaklega þar sem það var ekki hægt að læsa hurðinni að innan. Við sváfum ekki meira þessa nótt, af ótta við að aftur yrði ruðst inn á okkur.“
Ferðamaðurinn segir að þau hafi fengið gistingu sína endurgreidda en forsvarsmenn hótelsins hafi ekki sýnt neina iðrun vegna málsins.
Mannlíf náði sambandi við afgreiðslu Hótel Duus þar sem fengust þau svör að ekki væri hægt tjá sig um einstök tilfelli en eigendur hótelsins „gætu ekki hleypt sér inn í herbergi“ gesta án leyfis. Mannlíf hefur reynt að ná sambandi við Sigurbjörn Sigurðsson, eiganda Hótel Duus, án árangurs.
Athugasemdir