Anna Kristjánsdóttir segir son sinn vera orðinn lygnari er hún í nýrri dagbókarfærslu á Facebook.
Húmoristinn og vélstjórinn Anna Kristjánsdóttir segir frá skemmtilegum hrekk sem sonur hennar gerði tengdaföður sínum á Tenerife í gær. Segir hún að sonur hennar sé orðinn álíka lyginn og sumir ættingjar hans.
„Dagur 2126 – Ég heppin.
Ég nefndi hér um daginn að sonur minn væri farinn að sverja sig í ættina og orðinn jafnlýginn og sumir ættingjar hans þó að mér undanskilinni sem hefi ávallt sannleikann í hávegum, allavega þegar það hentar mér.“
Segir Anna að sonur hennar sé nú í heimsókn á Tenerife auk barna sinna og tengdaforeldrum. Sonurinn reyndi hvað hann gat til að fá móður sína til að koma með fjölskyldunni út að borða, án árangurs, þar sem Anna er lítið fyrir það að ferðast mikið til þess eins að borða.
„Umræddur sonur minn sem staddur er hér á eyjunni ásamt þremur barna sinna og tengdaforeldrum fór fram á það að ég borðaði með þeim á Hvítu myllunni, veitingastað úti í Adeje. Ég sá öll tormerki þess að mæta, enda nenni ég yfirleitt ekki að þvælast yfir í aðra hreppa til þess eins og borða kvöldmat og færðist undan mætingu og að lokum héldu þau öll á veitingastaðinn án mín.“
Og þá kemur að hrekknum:
„Að sögn einhverra viðstaddra laumaði sonur minn því að yfirþjóninum að einn í hópnum, nánar tiltekið tengdafaðirinn, ætti afmæli. Svo komu þjónarnir og sungu fyrir „afmælisbarnið“ og „afmælisbarnið“ tók undir. Svo var honum færð afmæliskaka og þá fór að kárna gamanið því tengdapabbinn vildi ekki kannast við að eiga afmæli, en allt fór vel að lokum og sonur minn neyddist að lokum til að játa að hann hefði skrökvað til um afmæli tengdaföðursins, en sem betur fer er tengdapabbinn ljúflingur hinn mesti og tók lýgi tengdasonarins með jafnaðargeði.“
Anna er þakklát fyrir að hafa neitað að mæta í matinn þar sem hún hefði þá líklega orðið fyrir hrekknum.
„Ég þakka fyrir að hafa ekki mætt á staðinn því þá hefði drengurinn logið upp á mig afmæli eða einhverju enn verru, en á sama tíma sat ég bláedrú heima við að afsaka pistil dagsins á undan.“
Að lokum segist Anna vera ánægð með að sonurinn sé farinn að sverja sig í ættina hvað lygina varðar:
„Ég hefi sagt það áður að drengurinn er orðinn lýgnari en ég og er þá mikið sagt, sennilega farinn að líkjast bróður mínum í skröksögum svo ekki sé talað um föður minn og föðurbróður sem báðir þóttu miklir sagnamenn. Ég er ánægð með drenginn, loksins farinn að sýna af sér eðlilega hegðun ættarinnar þótt kominn sé hátt á fimmtugsaldurinn. Um leið er ég heppin að tengdafaðir hans kann að meta svona grín.“
Athugasemdir