Maðurinn sem lést í sjósundi út af Örfirisey í lok maí hét Michal Gabriš. Michal er frá Slóvakíu og var 27 ára er hann lést.
Í slóvenska fréttamiðlinum tvnoviny.sk segir að Gabriš sé frá norðvesturhluta Slóvakíu og að hann hafi ferðast um allt Ísland á vespu, 1.300 kílómetra þvert yfir landið. Hann hafi hins vegar látist aðeins örfáum dögum dögum eftir að hafa lokið þessu ótrúlega markmiði, er hann ákvað að fá sér sundsprett út af Örfirisey í Reykjavík 29 maí síðastliðinn.
Umfangsmikil leit hófst upp úr klukkan 16:30 sama dag en þrátt fyrir mikla leit fannst hann ekki fyrr en daginn eftir, þá látinn.
Samkvæmt miðlinum var Michal Gabriš 27 ára ævintýramaður frá þorpinu Zákopčie í Čadca-héraði, og að hann hafi lagt af stað til Íslands með eitt markmið, að ferðast umhverfis eyjuna á vespu.
Ferðalagið, sem hann hóf í lok apríl, stóð yfir í 13 daga og hann skráði framfarir sínar daglega á samfélagsmiðlum. „Myndirnar geisluðu af íslenskri hörku, sterkum vindum, hrárri náttúru, fjörðum og eyðilegum vegum“, eins og það er orðað í slóvenska miðlinum.
„Ég enda ferðalag mitt við frægu kirkjuna í miðbænum. Ég er loksins kominn aftur til Reykjavíkur. Hið ómögulega er orðið að veruleika. Einn stór draumur sem ég hafði með mér til Íslands hefur ræst,“ skrifaði hann á Facebook eftir að hafa lokið áskoruninni með góðum árangri.
Á samfélagsmiðli gamla framhaldsskóla Mihcal, í Žilina, var hans minnst.
„Í dag fengum við dapurlegar fréttir. Fyrrverandi nemandi okkar, Miško Gabriš, lést því miður á Íslandi. Vinsamlegast hugsið til hans í bænum ykkar,“ sagði skólinn á samfélagsmiðlum.
Á stuttri ævi sinni ferðaðist Michal til margra heimshorna, að því er fram kemur í slóvenska fjölmiðlinum.
„Þrá hans eftir ævintýrum, þekkingu og að sigrast á eigin takmörkum var mörgum innblástur,“ segir að lokum í frétt fjölmiðilsins.
Athugasemdir