Rannsókn á andláti Hans Löf er á lokametrunum samkvæmt lögreglunni á höfuðborgarsvæðinu en Margrét Löf, dóttir hans, situr í gæsluvarðhaldi og hefur stöðu sakbornings. Hún hefur verið í gæsluvarðhaldi síðan í apríl vegna málsins.
Einhverjir voru hissa þegar gæsluvarðhaldi yfir Margréti Löf var aftur framlengt þann 3. júní en hún mun losna úr því 1. júlí.
„Vegna þess að hún er undir sterkum grun um að hafa framið alvarlegt ofbeldisbrot og því er það talið nauðsynlegt, með tilliti til almannahagsmuna,“ sagði Ævar Pálmi Pálmason, aðstoðaryfirlögregluþjónn hjá lögreglunni á höfuðborgarsvæðinu, þegar hann var spurður út í ástæðuna.
„Ekki gott að segja til um það nákvæmlega en hún er á lokametrunum,“ sagði Ævar um hvenær búast megi við að rannsókn á málinu ljúki. Hann segir engar nýjar upplýsingar hafa komið fram á undanförnum dögum.
Aðspurður hvort hann hafi lesið eitthvað í fjölmiðlum um málið sem hann vilji leiðrétta sagði Ævar einfaldlega: „Nei.“
Athugasemdir