Costco á Íslandi ætlar greiða út 4,5 milljarða í arðgreiðslur og er þetta í fyrsta sinn sem fyrirtækið gerir það hér á landi, en Costco opnaði verslun sína í Kauptúni í Garðabæ þann 23. maí árið 2017.
Kemur fram í skýrslu stjórnar, í nýbirtum ársreikningi Costco, að arðgreiðslan sé sögð endurspegla afar sterka fjárhagslega afkomu fyrirtækisins.
Vörusala Costco hér á landi jókst um 9% milli ára. Nam tæplega 24,8 milljörðum króna á síðasta reikningsári er lauk þann 31. ágúst síðastliðinn.
Það kemur einnig fram að rekstrarhagnaður Costco fyrir afskriftir jókst úr 276 milljónum í 335 milljónir á milli ára og rekstrarhagnaður nam 36 milljónum króna á síðasta reikningsári, borið saman við 4,7 milljónir árinu áður.
Stjórn félagsins færir í tal að framlegð á rekstrarárinu hafi verið 12,6%, borið saman við 12,9% árið áður, sem stjórn Costco rekur til þess að félagið hélt áfram að viðhalda verðlagningu sinni í ljósi verðbólguþrýstings sem og minni framlegðar í öllum vöruflokkum.
Hagnaður Costco nam um 605 milljónum króna eftir skatta á síðasta rekstrarári, borið saman við 538 milljónir árið áður.
Eignir Costco í lok ágúst í fyrra námu 14,6 milljörðum króna, en þar af var fasteign félagsins í Kauptúni í Garðabæ metin á 3,7 milljarða króna.
Vert er að benda á að handbært fé Costco hér á landi nam yfir 7 milljörðum króna í lok síðasta rekstrarárs og eigið fé fyrirtækisins var 10,7 milljarðar. Skuldir voru 3,6 milljarðar króna.
Athugasemdir