Heitir nú sama nafni og uppáhalds tölvuleikjapersónan

Í nýlegum úrskurði Manna­nafna­nefndar er greint frá því að nefndin hafi sam­þykkt nafnið Link en það er nafn einnar vin­sæl­ustu tölvu­leika­per­sónu allra tíma. Nafnið kemur úr Zelda tölvu­leikja­ser­í­unni sem selst hefur í tugum millj­óna ein­taka.

Maðurinn sem óskaði eftir úrskurði um nafnið er húð­flúr­ar­inn Baldur Link Smárason, sem er mjög ánægður að hafa fengið nafnið leyft.

„Ég er búinn að vera spá í þessu í mörg mörg ár,“ sagði Baldur Link við Mannlíf um nafna­breyt­ing­una. „Þetta er einn af þessum hlutum sem ég hef aldrei gert neitt í og maður ýtir því til hliðar. Svo um dag­inn þá er ég að spila aftur Zelda og ákvað bara að gera þetta. Svo er ég hrif­inn af nafn­inu, hvernig það hljómar og hvernig stafirnir standa saman. Ég hef unnið sem tattú­artisti og pæli mikið í hvernig allt passar saman.“

Link hefur tekið breyt­ingum í gegnum árinFyrsti leik­ur­inn kom út árið 1986

Baldur Link, sem er fæddur árið 1981, telur að hann hafi fengið Nintendo tölvu árið 1987 eða 1988. Hann hafi um leið tengst Link og að Zelda leik­irnir hafi verið hans upp­á­halds­leikir. Yfir 20 Zelda leikir hafa komið út og seg­ist Baldur Link hafa spilað þá alla.

„Það er Link to the Past og svo eru þessir nýju ótrú­legir,“ segir hann spurður um hvaða leikir séu í upp­á­haldi af Zelda leikj­unum.

„Ég skrif­aði smá grein­ar­gerð um þetta væru æskuminn­ingar og svo­leiðis. Svo var ég bara að vona,“ segir tölvu­leikja­spil­ar­inn um hvort hann hafi verið bjart­sýnn á að fá leyfi fyrir nafna­breyt­ing­unni. „Mér fannst þetta vera 50/50, af því að ég fór að rann­saka önnur nöfn. Hvað er leyft og hvað ekki og mér fannst alveg ansi mikið af enskum nöfnum, af því að Link er nátt­úru­lega enskt nafn og það er hægt rekja það aftur til mið­alda. Ef þeir leyfa fullt af öðrum enskum nöfnum, af hverju ekki þetta?“