Æðstu stjórnendur Manchester United dvöldu nýverið á Vopnafirði þar sem þeir ræddu framtíðarstefnu félagsins í afslöppuðu umhverfi. Dvölin fór fram að frumkvæði Jims Ratcliffe, eiganda Ineos og ráðandi hluthafa í félaginu, sem á jarðir í kringum nokkrar helstu laxveiðiár svæðisins.
Fram kemur í íþróttamiðlinum The Athletic að Omar Berrada, framkvæmdastjóri United, og Jason Wilcox, yfirmaður íþróttamála, hafi mætt á staðinn til fundarhalda með Ratcliffe. Þjálfaranum Ruben Amorim var boðið með í ferðina, en ákveðið var að hann yrði eftir í Manchester til að sinna undirbúningi liðsins.
Ratcliffe hefur skapað sér þá hefð að funda með lykilfólki sínu í rólegu umhverfi víðs vegar um heiminn, þar sem hann telur slíkar aðstæður henta vel til að komast að kjarna mála. Megintilgangur Vopnafjarðarferðarinnar var að ræða stefnu félagsins, bæði íþróttalega og fjárhagslega, þar á meðal leikmannamál.
Þrátt fyrir lélegt fjarskiptasamband við árnar tókst þeim að ganga frá tilboði í framherjann Bryan Mbeumo upp á 70 milljónir punda. Mbeumo hefur verið á óskalista félagsins í sumar.
Stjórnendurnir funduðu reglulega meðan á dvölinni stóð, en sumir í hópnum nýttu líka tækifærið til að veiða í ánum hans Ratcliffe. Þetta er ekki í fyrsta sinn sem hann nýtir Vopnafjörð fyrir slíka fundi en í fyrra bauð hann Glazer-fjölskyldunni, meðeigendum sínum í United, til sambærilegrar samveru.
Frá Vopnafirði mun hópurinn halda til Svíþjóðar þar sem United leikur sinn fyrsta æfingaleik fyrir næsta tímabil. Eins og áður hefur einkaþotufloti Ineos verið nýttur til að ferja hópinn á milli Egilsstaða og Evrópu. Tvær slíkar vélar fara í dag, önnur til Nice í Frakklandi og hin til Englands.
Manchester United á að baki eitt sitt versta tímabil í áratugi og því ljóst að næstu ákvarðanir stjórnenda skipta miklu máli.
Athugasemdir