Hallur Kristján Jónsson, tónlistarmaður og starfsmaður hjá Iðnó, komst í fréttirnar á dögunum þegar Mannanafnanefnd samþykkti viðbótarnafn hans, Snjókaldur. Mannlíf ræddi við Hall.
Ástæðan fyrir nafninu Snjókaldur tengist eiginkonu Halls, Sigríði Ellu Frímannsdóttur, að sögn Halls.
„Þetta varð til þannig að þetta var einhverskonar uppnefni sem konan mín bjó til. Það var ýmist Haraldur eða Snjókaldur.“
Halli fannst það síðan skrítið að þetta nafn væri ekki til og ákvað að gera eitthvað í því.
„Svo fannst mér það svo asnalegt að þetta nafn væri ekki til, þetta er svo geggjað nafn. Ég fór og kannaði það og lét svo verða af því að sækja um það.“
Segir Hallur þetta vera hálfgerðan gjörning.
„Þetta er svona gjörningur, að búa til nýtt nafn sem hljómar eins og það hafi alltaf verið þarna,“ segir Hallur og hlær.
Aðspurður hvort hann þyrfti ekki nú að sækja um ný skilríki og vegabréf, sagðist Hallur hvort sem er hafa þurft að sækja um nýtt vegabréf.
„Ég þurfti hvort sem er að endurnýja vegabréfið, allt hitt er eitthvað rafrænt drasl.“
En hvernig voru viðbrögðin við nýja nafninu?
„Ég náði ekki að láta mömmu og pabba vita en þau lásu þetta í fréttunum en þau föttuðu það strax að þetta væri ég. En almennt þá hefur þetta kveikt bros og það er meira að segja búið að stytta þetta niður í Snjósi hérna í vinnunni.“
Hallur Snjókaldur, sem kemur frá Egilsstöðum, var stundum þekktur undir nafninu Hale Johnson en hann var meðal annars í rafpopphljómsveitinni Bloodgroup ásamt systkinum sínum tveimur og fyrrum mági. Það viðurnefni kom frá gömlum sögukennara í Menntaskólanum á Egilsstöðum.
„Þetta var hann Björn Vigfússon, sögukennari sem bjó þetta til. Hann hafði viðurnefni á flesta nemendur sína,“ segir Hallur hlæjandi og bætir við: „Þegar það var nafnakall kom alltaf „Hale Johnson?“ en svo varð það listamannanafnið þegar maður var að stíga fyrstu skrefin í poppbransanum.“
En er Hallur Snjókaldur alveg hættur í poppinu?
„Nei, ég nú að sjá um menningarhúsið Iðnó og það er heldur betur líf hérna en ég er ekkert að spila sjálfur, ekki fyrir aðra en sjálfan mig.“
Athugasemdir