Þórgnýr þurfti að ígrunda sambandið við kærustuna vegna svefnvenja hennar

Þórgnýr Thorodd­sen, fyrrum for­maður ÍTR, var vanur að fara seint að sofa áður en hann kynnt­ist kon­unni sinni en hann er nýjasti gestur hlað­varps­ins Sofum saman.

Í þætt­inum segir hann frá líf­inu, aðgerð sem hann var að koma úr og hvaða aðferðir hann notar til að kom­ast í svefn­flæði.

Konan kvöldsvæfasta manneskja allra tíma

„Mér finnst ofsa­lega leið­in­legt að sofa,“ segir Þórgnýr í þætt­inum en hann seg­ist sjá eftir öllum þeim tíma sem hann setur í svefn. Hann væri til að nýta þá í eitt­hvað annað. „En ég sef alveg mína sjö, átta tíma á hverri nóttu og er alveg góður í því að sofa. En í svona tíu ár þá svaf ég ábyggi­lega ekki mikið meira en fjóra, fimm tíma á nóttu. Það var bara svo gaman. Það var alltaf eitt­hvað að gera. Og svo kynnt­ist ég kon­unni minni og hún er kvöld­svæfasta mann­eskja allra tíma. Hvað var ég búinn að koma mér út í? Ég var bók­staf­lega að pæla í að hætta með henni vegna þess að ég bara meik­aði þetta ekki. Klukkan tíu á kvöldin þá var hún bara byrjuð að geispa og sagð­ist ætla að fara að sofa.“

Hann segir hins vegar að þegar manni líki við aðra mann­eskju þá byrji maður að mæt­ast í miðj­unni. Svefn­tími kon­unnar hafi þá færst yfir ell­efu og hans nær mið­nætti frá tvö.

„Einbeittu þér að sársaukanum”

Í þætt­inum segir for­mað­ur­inn fyrr­ver­andi frá aðgerð sem hann þurfti að fara í en annar fótur hans var réttur af.

„Þetta var stór aðgerð, ég er ennþá að ná mér. Það er alveg þriggja til fjög­urra mán­aða ferli að jafna sig eftir þessa aðgerð,“ segir Þórgnýr og við­ur­kennir að hann hafi ótt­ast að svefn­inn væri í rugl því hann var svo gott sem fastur inni í tvo mán­uði.

„Mér var illt í fæt­inum. En svefn­inn minn var bara svo­lítið venju­legur fyrstu vik­urnar. Ég tók park­ódín til að draga úr mestu óþæg­ind­unum. Og þegar mér var illt og það var að trufla mig þá minnt­ist ég þess þegar ég var í mennta­skóla og hafði fengið paper cut, skorið mig á blað. Mér var ógeðs­lega illt í putt­anum og einn félagi minn var með lækn­ingu við þessu. Nú? Hver er lækn­ingin? Hann sagði: „Ein­beittu þér að sárs­auk­anum. Hugsaðu um sárs­auk­ann. Virki­lega reyndu að finna fyrir honum og fók­usa á hann.”